Ministri i Brendshëm, Besfort Lamallari, ka çuditur me reagimin e tij pas dhunës policore të paprecedentë. Ai uroi efektivët e policisë për punën e kryer gjatë protestës së opozitës.
“Përgëzime Policisë së Shtetit për reagimin profesional, vetëpërmbajtjen dhe neutralizimin e menjëhershëm të molotovarëve të përdorur si mish për top për të djegur qytetin, për të nxirë vendin dhe për të rrezikuar jetën e efektivëve me uniformë”, shkroi ministri në një postim në Facebook.
Ai shtoi se “Shqipëria nuk do të merret peng nga një pakicë që nuk ngurron të përdorë të miturit për të djegur dhe për të fshehur dështimin e vet. Mes atyre që ndërtojnë të ardhmen europiane të vendit dhe atyre që kërkojnë ta djegin atë, zgjedhja është tashmë e qartë nga mbarë shqiptarët”.
Tubimi u shoqërua me tensione e përplasje menjëherë pasi nisi hedhja e fishekzjarrëve drejt Kryeministrisë.
Protestues dhe deputetë demokratë, përfshi Luçiano Boçin, Klevis Balliun dhe Flamur Nokën u lënduan pasi policia hodhi gaz lotsjellës dhe spraj në drejtim të tyre. Po ashtu nuk munguan as shkelmat e shkopinjtë.
