Një 23-vjeçar është arrestuar nga Policia në Bajram Curri, pasi u kap duke qarkulluar me armë zjarri pa leje dhe në gjendje të dehur.
Policia thotë se i riu, i identifikuar si Akil Gjongecaj u ndalua teksa drejtonte një automjet tip “Benz”, ku gjatë kontrollit iu gjet një armë zjarri pistoletë me municion luftarak.
Gjithashtu, nga hetimet paraprake dyshohet se 23-vjeçari ka qëlluar më herët në ajër me armën që e posedonte pa leje.
“Ky shtetas u kap në flagrancë nga shërbimet e Policisë, në qytetin e Bajram Currit, duke qarkulluar me automjetin tip “Benz”, ku gjatë kontrollit iu gjet 1 armë zjarri pistoletë, me municion luftarak. Nga kryerja e testit të alkoolit, 23-vjeçari rezultoi në gjendje të dehur. Nga hetimet dyshohet se shtetasi A. Gj. ka qëlluar në ajër, me armën e zjarrit që e posedonte pa leje”,- thuhet në njoftimin e Policisë.
Materialet procedurale i kaluan Prokurorisë, për veprime të mëtejshme.
