Gjykata Kushtetuese ka zbardhur këtë të mërkurë, më 15 prill, vendimin që pranoi pjesërisht kërkesën e gjyqtarëve për rritje të pagave të tyre.
Gjykata Kushtetuese vendosi më 17 shkurt që paga e gjyqtarëve nuk mund të ulet, por ia la si detyrë Kuvendit të bëjë ndryshimet ligjore.
Ndërsa sot ka publikuar argumentet e plota të marrjes së këtij vendimi i marrë me një dakordësi 7-1, ku i vetmi që ka kërkuar rrëzimin e kërkesës së gjyqtarëve ka qenë Gent Ibrahimi.
“Gjykata vlerëson se i takon Kuvendit të miratojë ndryshimet ligjore të nevojshme, sipas arsyetimit të këtij vendimi, që të shmangë uljen e fshehur dhe ta përshtasë pagën e magjistratëve në raport të drejtë me rritjet e tjera dhe detyrën e funksionin, gjë e cila duhet të realizohet brenda datës 31.07.2026. Kuvendi mund të zgjedhë të përshtasë formulën e re në mënyrë që të riparojë uljen e fshehtë ose duke iu referuar ndryshimit që pësoi kategoria e nëpunësve civilë në të cilët referonte formula e vjetër ose ndryshimit që pësoi paga e Presidentit, ose çdo zgjidhjeje tjetër të krahasueshme me ndryshimet e kategoritë e mësipërme dhe brenda limiteve të tyre, gjithnjë në respektim të garancive të nenit 138 të Kushtetutës, duke mbajtur në vëmendje edhe faktin që inflacioni dhe situata ekonomike kanë efekt të njëjtë mbi të gjitha kategoritë e punonjësve, pavarësisht detyrës dhe funksionit që kryejnë.”, thuhet në vendimin e Gjykatës Kushtetuese.
Si nisi çështja
Më 3 mars të vitit të kaluar, Unioni i Gjyqtarëve kërkoi shfuqizimin e ndryshimeve të miratuara në vitin 2023 për pagat e magjistratëve. Sipas ligjit të ri, paga bazë e gjyqtarëve u përcaktua në masën 36% të pagës së Presidentit, që përkthehet në rreth 153 mijë lekë.
Më parë, paga referuese ishte ajo e drejtorit të departamentit në Kryeministri, në nivelin 132,100 lekë. Me ndryshimin e formulës, paga e gjyqtarëve u rrit me mbi 20 mijë lekë krahasuar me nivelin e mëparshëm.
Megjithatë, gjyqtarët argumentuan se ndryshimi në praktikë përbënte ulje relative, pasi ndërkohë u rritën pagat në administratën publike dhe paga e drejtorit të departamentit në Kryeministri arriti në 231 mijë lekë. Sipas tyre, nëse do të ruhej referenca e mëparshme, paga do të ishte rreth 78 mijë lekë më e lartë.
Gjyqtarët kanë kërkuar rikthimin te formula e vjetër ose përcaktimin e pagës në masën 54.3% të pagës së Presidentit, me reflektim automatik të çdo rritjeje të përgjithshme.
Një ndryshim i tillë do të sillte rritje të ndjeshme të pagave, që sipas llogaritjeve të paraqitura nga kërkuesit, mund të variojnë nga rreth 1800 euro për magjistratët e shkallës së parë deri në mbi 3000 euro për gjyqtarët e Apelit të GJKKO-së dhe prokurorët e SPAK-ut.
Vendimi i Gjykatës Kushtetuese nuk përcakton drejtpërdrejt nivelin e ri të pagave, por detyron Kuvendin të rishikojë kuadrin ligjor.
Kryeministri Edi Rama ka kundërshtuar më herët kërkesat për ndryshimin e formulës së pagave të magjistratëve duke përdorur terma si “marrëbabëzi”, “skandal” dhe “turp kombëtar”.
Rama është shprehur se gjyqtarët janë tashmë kategoria më e paguar në vend falë mbështetjes së mazhorancës për Reformën në Drejtësi, po tentojnë të uzurpojnë kompetencat e parlamentit dhe qeverisë për të “thyer piramidën shtetërore të pagave”.
