Arkitekti Titi Seranaj ka reaguar në lidhje me zjarrin e rënë pasditen e djeshme në kompleksin “Arlis” në Tiranë, ku u shkrumbuan rreth 30 apartamente dhe u lënduan disa banorë.
Në një postim në rrjete sociale, Seranaj, ka analizuar në detaje mënyrën e ndërtimit të godinës dhe materialet e përdorura, duke ngritur pikëpyetje serioze mbi standardet e zbatuara nga kompania e Armand Lilos.
Sipas Seranajt, sistemi i përdorur në fasadën e pallatit nuk është ai klasik kapot, por një fasadë e ventiluar, ku midis materialit termoizolues dhe veshjes së jashtme ekziston një hapësirë ajri që shërben për qarkullim. Pikërisht kjo hapësirë, sipas tij, në rast zjarri mund të përshpejtojë përhapjen e flakëve.
Ai shton se materialet e përdorura në këtë objekt dyshohet se nuk kanë përmbushur standardet, çka ka bërë që zjarri të përhapet me shpejtësi, i ndihmuar nga qarkullimi i ajrit në hapësirën e ventiluar.
Deklaratat e arkitektit hedhin hije dyshimi mbi cilësinë e punimeve dhe materialeve të përdorura nga kompania e lidhur me Armand Lilon, i njohur ndryshe edhe si klient i Edi Ramës apo njeriu i kateve pa leje.
Postimi i arkitektit:
Nuk është sistem Kapot,por fasadë e Ventiluar.
Sistemi kapot është bashkimi me ngjitje i disa materialeve që mbështjell fasadën e objektit; ngjitësi,termoizolusi(polistiren,polisterol,lesh guri i presuar),mbi të rrjetë, baza apo kolla e vetë hidroizoluese,suvatimi ose grafiato dhe në fund boja..
Pavarsisht cilësisë së termoizoluesit ky sistem mund të pësoj dëmtime por është i sigurtë për mbrojtjen nga zjarri
..
Në fasadat e ventiluara,siç është rasti, midis materialeve termoizoluese dhe veshjes përfundimtare ka hapsirë,për qarkullimin e ajrit.
Materiali përfundimtar i veshjes mund të jetë panel qeramike,mermeri,granili, xhami, të kombinuara apo dhe deri panele fotovoltaike..etj etj.
Në rastin konkret apo dhe në 99%të rasteve që përdoren sot paneli është alukobond(alumin shumë i hollë meshtresa)..
Materiali termoizolues është lesh mineral dhe jo polisterol..
Fasadat e ventiluara janë një zgjidhje shumë e mirë për estetikën dhe komfortin termik kur përdoren materialet e duhura që plotësojnë gjithë specifikimet teknike..në rast të kundërt shkaktojnë katastrofa si kjo,as e para dhe as e fundit për fat të keq, e që mesa duket është abuzuar gjithandej..
..materialet pa standart të përdorura në rastin konkret u shkrumbuan në pak minuta pasi rrumat e ajrit në hapsirën e ventiluar e ndihmojnë zjarrin.
Ajo që më habit në rastin konkret është fakti që leshi mineral i ka rezistuar djegies më shumë se Alukobondi, që presupozohet të jet alumin i padjegshëm.
