Zgjedhjet e përgjithshme në Hungari, ku përballen kryeministri aktual Viktor Orbán dhe rivali i tij Péter Magyar, janë mbyllur me një pjesëmarrje të lartë që raportohet të ketë kaluar mbi 75%. Interesi i qytetarëve hungarezë për të votuar ka qenë i jashtëzakonshëm, në një garë që konsiderohet vendimtare për drejtimin politik të vendit.
Sipas BBC, sondazhet e para sugjerojnë se Viktor Orbán mund të sigurojë një mandat të pestë si kryeministër i Hungarisë. Megjithatë, situata mbetet e hapur, pasi disa sondazhe të tjera tregojnë një garë më të ngushtë.
Dy prej sondazheve të njohura të opinionit publik, Median dhe 21 Research Centre, kanë raportuar më herët shanse të forta për fitoren e Péter Magyar, duke treguar një garë të balancuar mes dy kampeve politike.
Ndërkohë, një tjetër sondazh i publikuar nga Alapjogokért sugjeron një epërsi të partisë në pushtet Fidesz me 44.5%, ndërsa opozita Tisza renditet me rreth 42%. Megjithatë, këto të dhëna po trajtohen me kujdes dhe skepticizëm nga analistët.
Derisa të publikohen rezultatet zyrtare, situata mbetet e paqartë dhe pritshmëritë janë të larta, me rezultatet e para që pritet të dalin brenda orëve në vijim.
