Një zhvillim historik është shënuar në Hungari, ku lideri i opozitës Péter Magyar ka fituar zgjedhjet parlamentare, duke i dhënë fund 16 viteve në pushtet të kryeministrit Viktor Orban.
Sipas rezultateve paraprake, Péter Magyar dhe partia e tij Tisza Party kanë siguruar 135 vende nga 199 në parlament, me mbi 45% të votave, duke marrë një shumicë të fortë.
Ndërkohë, Fidesz e udhëhequr nga Viktor Orban ka siguruar vetëm 57 mandate, sipas të dhënave nga Europe Elects.
Në një reagim në rrjetet sociale, Péter Magyar bëri të ditur se Orbán e kishte uruar në telefon për fitoren, ndërsa falënderoi qytetarët për mbështetjen.
Megjithatë, ai ngriti shqetësime për parregullsi gjatë procesit zgjedhor, duke deklaruar se partia e tij ka marrë ankesa për mashtrime dhe përpjekje për të ndikuar në rezultat.
“Kushdo që kreu ose nxiti mashtrim zgjedhor do të mbahet përgjegjës para ligjit,” paralajmëroi ai, duke shtuar se do të ketë hetime dhe masa ligjore nëse këto pretendime konfirmohen.
Si funksionon sistemi zgjedhor në Hungari:
Zgjedhjet parlamentare në Hungari mbahen çdo katër vjet. Nga 199 deputetë, 106 zgjidhen në zona njëemërore me sistem shumice, ndërsa 93 të tjerë përzgjidhen nga lista kombëtare proporcionale.
Në zgjedhjet e fundit të vitit 2022, Fidesz kishte fituar 135 vende, duke siguruar një supershumicë që i mundësoi Viktor Orbán të avanconte reforma kushtetuese.
Para vitit 2010, vendi përdorte një sistem tjetër zgjedhor me 386 vende parlamentare, përpara rikthimit në pushtet të Orbán dhe partisë së tij.
