Gjykata e Posaçme ka shpallur dënimin për biznesmenin Rezart Taçi, duke e dënuar me 11 vite burg për akuzën e pastrimit të parave në bashkëpunim me mafien italiane, Cosa Nostra.
SPAK kishte kërkuar 13 vite burgim, ndërsa prokurori Klodian Braho në fjalën e tij kërkoi gjithashtu konfiskimin e mbi 18 milionë eurove të depozituara në një bankë në Tiranë, të cilat do të shpërndaheshin në llogari në Hong Kong dhe Singapor.
Në këtë skemë të pastrimit të parave, të hetuar nga SPAK, rezultuan të implikuar edhe Francesco Zummo, i akuzuar në Itali për favorizimin e Cosa Nostras, si dhe Fabio Petruzzella dhe Daniele Cestagalli.
Nga kjo aferë, dyshohet se Taçi do të përfitonte rreth 3 milionë euro, ndërsa paratë u tentuan të legjitimohej si investim në fushën e hidrokarbureve.
SPAK paraqiti si provë edhe një draft-marrëveshje për shumën e 18 milionë eurove, e cila do të jepej si hua me interes 5%.
Transaksionet u ndërprenë pas ndërhyrjes së SPAK, duke çuar në bllokimin dhe konfiskimin e shumës monetare.
