Nga Asambleja e Partisë Socialiste te Njësia nr. 14 në Tiranë (Kashar), kryeministri Edi Rama iu përgjigj edhe pyetjeve të një anëtari në lidhje me procesin e legalizimeve dhe problematikat e tij të zvarritjeve për mijëra qytetarë.
Rama u shpreh se deri tani janë kryer rreth 300 mijë legalizime, por procesi ka mbetur i zvarritur dhe i padrejtë, pasi disa aplikues të vonë kanë marrë certifikatat më shpejt se ata që kanë aplikuar vite më parë.
Ai kritikoi mënyrën e trajtimit të dosjeve “me bllok”, duke e cilësuar të padrejtë që brenda të njëjtit grup njëri merr legalizimin dhe tjetri jo.
“Kemi diskutuar për legalizimet sepse është proces i vështirë. Janë bërë 300 mijë legalizime deri tani, janë shumë, por ka akoma e duhen bërë. Një pjesë janë problem sepse janë të pamundura nga ligji aktual, jo mbi kolektor, jo mbi rrugë etj.
Një pjesë tjetër duhet bërë, kjo e bllokut, fillon blloku e mbaron blloku është për mua, por jo për Kadastrën. Por më e drejta është koha e regjistrimit, ajo që më shqetëson është dikush që e pret prej 2010 legalizimin duhet të presë akoma dhe dikush që e ka bërë më 2018 ta marrë më para.
Pra nuk duhet të merret nga blloku, kur ndodh brenda në bllok kjo njëri e merr e tjetri jo, kjo ka problem. Tani do bëhet me kritere të qarta dhe me vite e njerëzve t’u thuhet prit se jemi akoma te viti “X”.
Por jo njërit t’ia bëjmë e tjetri të presë. Bashkitë kanë rolin e tyre, do përpiqemi e ne për më shumë kapacitet, duke përdorur njësitë bashkiake, koordinatorët, kryepleqtë, gjithsesi puna vazhdon, nuk është se ka ngecur”, shpjegoi kryeministri.
“Puna tjetër është dixhitalizimi i hartave sepse një pjesë është me hap harta dhe mbyll harta. Deri tani janë skanuar 54 milionë fletë nga ato tabakët. Por secila nga ato ka 4, 6 apo 8 veprime ndaj llogariteni vetë se çfarë punë e madhe është bërë. Dhe brenda 2027 do e kemi çdo gjë të dixhitalizuar dhe do jetë më e thjeshtë”, tha Rama.
