Një 39-vjeçar është arrestuar nga policia në Lushnjë pasi dyshohet se i ka vënë zjarrin automjetit të një shtetasi, me porosi të një 28-vjeçari, i cili është shpallur në kërkim.
Ngjarja u regjistrua në fshatin Pluk, ku shtetasi D. V. kallëzoi se automjeti i tij ishte djegur pranë banesës. Si rezultat i hetimeve, u bë i mundur identifikimi, kapja dhe arrestimi i autorit të dyshuar, shtetasit M. B., 39 vjeç, banues në zonë dhe me precedent penal.
Nga hetimet rezultoi gjithashtu se djegia e automjetit dyshohet të jetë kryer me porosi të shtetasit A. Z., 28 vjeç, i cili është aktualisht në kërkim. Sipas të dhënave paraprake, ai kishte konflikte për motive pronësie me xhaxhanë e pronarit të automjetit të djegur.
“Menjëherë pas kallëzimit të shtetasit D. V., se i kishin djegur automjetin, në afërsi të banesës së tij, në fshatin Pluk, shërbimet e Komisariatit të Policisë Lushnjë organizuan punën operacionale dhe veprimet hetimore për të përcaktuar autorësinë e rastit dhe për të sqaruar rrethanat.
Si rezultat, u identifikua, u kap dhe u vu në pranga autori i dyshuar i djegies, shtetasi M. B., 39 vjeç, banues në këtë fshat.
Gjithashtu, u identifikua shtetasi që dyshohet se porositi kryerjen e këtij krimi, A. Z., 28 vjeç, i cili nga veprimet hetimore, rezultoi se ka qenë në konflikt me xhaxhanë e shtetasit D. V., për motive pronësie. Punohet intensivisht për kapjen e 28-vjeçarit.”– njofton policia.
Materialet procedurale iu referuan Prokurorisë së Fierit, për veprime të mëtejshme.
