Një ngjarje e pazakontë ka ndodhur mesnatën e kaluar në Vlorë, ku një 14-vjeçar u arrestua pasi drejtonte automjetin në mënyrë të rrezikshme dhe nuk iu bind urdhrit të ndalimit nga Policia.
Gjatë ndjekjes, ai përplasi një makinë policie, duke lënë të plagosur dy efektivë.
Sipas njoftimit zyrtar, patrulla e Policisë konstatoi automjetin në lagjen “24 Maji”, ku i mituri kryente manovra të rrezikshme. Pavarësisht urdhrit për ndalim, ai rriti shpejtësinë dhe tentoi të godiste shërbimet e Policisë.
Pas disa minutash ndjekjeje, në zonën e “Kinoteatrit”, ai përplasi automjetin e Policisë, duke shkaktuar dëmtimin e dy punonjësve, të cilët morën ndihmë mjekësore dhe ndodhen jashtë rrezikut për jetën.
Pas braktisjes së automjetit, i mituri tentoi të largohej me vrap, por u kap dhe u vu në pranga.
Reagimi i policisë:
Vlorë/ Arrestohet në flagrancë një 14-vjeçar që drejtonte automjetin në mënyrë të rrezikshme dhe nuk iu bind urdhrit të Policisë. Dëmtohen 2 punonjës Policie gjatë detyrës.
Specialistët e Seksionit të Trafikut Urban dhe Interurban në Komisariatin e Policisë Vlorë, në bashkëpunim me oficerin e Policisë Gjyqësore të Prokurorisë së Vlorës, kryen veprimet procedurale për arrestimin në flagrancë të një shtetasi 14 vjeç.
Shërbimet e Patrullës së Përgjithshme, rreth mesnatës, në lagjen “24 Maji”, kanë konstatuar një automjet që drejtohej nga i mituri, i cili po kryente manovra të rrezikshme në rrugë. Shërbimet e Policisë i kanë bërë shenjë për ndalim, por drejtuesi nuk i është bindur urdhrit, ka rritur shpejtësinë dhe ka tentuar të godasë shërbimet e Policisë me automjet.
Pas disa minutash ndjekjeje, në vendin e quajtur “Kinoteatri”, shërbime të tjera Policie i kanë bërë sërish shenjë për ndalim, por ai ka vijuar lëvizjen dhe ka goditur automjetin e Policisë, duke shkaktuar dëmtimin e 2 punonjësve të Policisë në detyrë.
Në vijim të ndjekjes, drejtuesi ka braktisur automjetin dhe ka tentuar të largohet me vrap, por është kapur dhe vënë në pranga nga shërbimet e Policisë.
Dy punonjësit e Policisë të dëmtuar morën ndihmë mjekësore në spitalin e Vlorës dhe ndodhen jashtë rrezikut për jetën.
Veprimet procedurale u kryen në prani të psikologut, mbrojtësit ligjor dhe nënës së të miturit, në përputhje me legjislacionin në fuqi për trajtimin e të miturve.
Automjeti që drejtonte 14-vjeçari u bllokua, ndërsa pronares së automjetit (nënës së tij) iu pezullua leja e drejtimit dhe iu vendos masë administrative, sipas parashikimeve të Kodit Rrugor.
Materialet procedurale iu referuan Prokurorisë, për veprime të mëtejshme, për veprat penale:
“Mosbindja ndaj urdhrit të punonjësit të policisë së rendit publik”,
“Drejtimi i automjetit në mënyrë të parregullt”,
“Shkatërrimi i pronës”.
Policia e Shtetit apelon për të gjithë prindërit që të ushtrojnë kontroll dhe përgjegjësi të vazhdueshme prindërore, duke mos lejuar në asnjë rast drejtimin e automjeteve nga të miturit, pasi këto veprime rrezikojnë seriozisht jetën dhe shëndetin e tyre, të përdoruesve të tjerë të rrugës, si dhe të vetë punonjësve të Policisë.
