Një shtetas shqiptar, Ylli Didani, është dënuar me 25 vite burg nga një gjykatë federale në Detroit, për akuza të lidhura me konspiracion për shpërndarjen e kokainës.
Didani, 48 vjeç, i cili më parë kishte jetuar në Michigan, u gjykua nga një juri që e shpalli fajtor për komplot për shpërndarje të kokainës, komplot për shpërndarje të drogës në bord të anijeve që i nënshtroheshin juridiksionit të SHBA-së, si dhe për komplot për pastrim të parave.
Hetimi zbuloi se organizata ndërkombëtare e trafikut të drogës që ai drejtonte kishte lidhje me Shtetet e Bashkuara, Amerikën e Jugut dhe Evropën. Gjatë viteve 2019 dhe 2020, autoritetet sekuestruan mbi 4,300 kilogramë kokainë, të transportuara në pesë anije kontejnerësh me destinacion porte ndërkombëtare.
Hetimi u realizua nga një task-forcë e përbërë nga Agjencia Kundër Drogës (DEA), Doganat dhe Mbrojtja Kufitare e SHBA-së, Departamenti i Sigurisë Kombëtare, Shërbimi i të Ardhurave të Brendshme, Hetimet Penale dhe Policia e Farmington Hills.
Didani dhe bashkëpunëtorët e tij planifikuan dhe financuan shpërndarjen e drogës nga disa vende, duke përfshirë Michiganin, duke e kthyer këtë rrjet në një nga trafikat më të mëdha të kokainës që janë hetuar nga autoritetet amerikane.
