Një vrasje dhe një tentativë vrasjeje të ndodhura në vitin 1999 në Itali janë zbardhur pas më shumë se dy dekadash, duke çuar në arrestimin e dy kushërinjve shqiptarë, 50 dhe 47 vjeç, të cilët ishin në arrati prej 26 vitesh.
Sipas mediave të huaja, ngjarja e rëndë kishte ndodhur në Cesa, ku dy shtetas shqiptarë u sulmuan me shkopinj dhe thika gjatë një prite të dhunshme. Si pasojë, njëri prej tyre humbi jetën, ndërsa tjetri mbeti i plagosur rëndë. Sipas hetimeve, sulmi lidhej me përplasje për kontrollin e aktiviteteve të paligjshme në zonë.
Menjëherë pas krimit, dy të dyshuarit u zhdukën, duke u strehuar në Shqipëri, ku dyshohet se kanë jetuar për vite me identitete të rreme. Ata u lokalizuan dhe u arrestuan në qytetin e Durrësit, falë bashkëpunimit mes Departamentit të Policisë Kriminale shqiptare dhe autoriteteve italiane të sigurisë.
Të arrestuarit janë ekstraduar drejt Italisë dhe kanë mbërritur në aeroportin e Fiumicinos, të shoqëruar nga Shërbimi për Bashkëpunimin Ndërkombëtar të Policisë, për t’u transferuar më pas në burg.
Ata do të përballen me akuzat për vrasje dhe tentativë vrasjeje.
