Kreydemokrati Sali Berisha zhvilloi një takim në Bruksel me Presidentin e Parlamentit të Rajonit të Brukselit, Bertin Mampaka, ku në fokus ishte situata politike në Shqipëri dhe procesi demokratik.
Gjatë takimit, Berisha paraqiti atë që e cilësoi si një situatë të vështirë demokratike në vend, duke iu referuar edhe raportit të V-Dem Institute, i cili e klasifikon Shqipërinë si “autokraci elektorale”.
Ai theksoi se, sipas tij, në Shqipëri prej më shumë se një dekade mungojnë zgjedhjet e lira dhe të ndershme, ndërsa ngriti shqetësimin për arrestimin e liderëve të opozitës në vit elektoral dhe ndikimin e krimit të organizuar në proceset zgjedhore.
Berisha u ndal edhe te roli i grupeve kriminale shqiptare dhe trafiku i drogës, duke theksuar se këto aktivitete po shtrihen nga Amerika Latine drejt porteve europiane dhe po ndikojnë negativisht në ekonomi, veçanërisht në sektorin e ndërtimit.
Ai përmendi gjithashtu emigracionin masiv, duke deklaruar se mbi 1.1 milion shqiptarë janë larguar drejt vendeve të Bashkimit Europian në dekadën e fundit, si dhe akuzoi mazhorancën për pengim të drejtësisë në raste konkrete.
Nga ana e tij, Mampaka vlerësoi rolin e Partisë Demokratike në mbrojtje të demokracisë dhe transparencës, duke u shprehur se do të adresojë shqetësimet e ngritura në institucionet përkatëse në Belgjikë.
Në përfundim, Berisha rikonfirmoi angazhimin e PD për integrimin europian të Shqipërisë, duke theksuar nevojën për rikthimin e shtetit të së drejtës dhe zhvillimin e zgjedhjeve të lira e të ndershme. Në takim, ai shoqërohej nga deputetët Albana Vokshi dhe Belind Këlliçi, si dhe përfaqësues të tjerë të PD dhe komunitetit shqiptar në Belgjikë.
