Një hetim i nisur nga prokuroria e Tiranës, ka vënë në qendër të vëmendjes disa nga zyrtarët e Ministrisë së Arsimit dhe Sportit, të cilët përmes falsifikimit të dokumenteve, kanë çuar në krijimin e dy federatave sportive paralele.
Qëllimi i zyrtarëve të ministrisë së Arsimit dhe Sportit, nuk ka qenë dëshira për ti shërbyer sportit, por vjedhja e fondeve publike përmes grandeve ekonomike që jepen çdo vit nga Buxheti i Ministrisë tek Federatat Sportive të çregjistruara pranë ministrisë dhe Komitetit Olimpik Kombëtar Shqiptar.
Dosja hetimore në prokurorinë e Tiranës është regjistruar nga prokurorja Elsa Kareci, e cila ka marrë indicien përmes një kallëzimi të depozituar në prokurori nga kampioni i Botës në Artet Marciale (Karate), Arbis Vjerdha.
Vjerdha, ka kallëzuar për “Falsifikim dokumentesh” dhe “Shpërdorim detyre”, disa nga zyrtarët e Ministrisë, duke përfshirë sekretarin e Përgjithshëm, zv/ministrin e Arsimit dhe Sporteve Endrit Hoxhaj deri tek sekretarin e Përgjithshëm të Federatës paralele “Kick-Boxing”, Elvis Bejko.
Konflikti ka lindur për shkaqe të mbivendosjes së dy Federatave Shqiptare të “Kick-Boxing”, duke synuar që përmes kësaj skeme të kryhet vjedhja e fondeve financiare nga buxheti i Ministrisë së Arsimit dhe Sportit.
Kampioni i Botës dhe Evropës, Arbis Vjerdha, prej muajit qershor 2012 ka regjistruar pranë Ministrisë dhe Komitetit Olimpik Kombëtar Shqiptar (KOKSH), Federatën Shqiptare të “Kick and Thai-Boxing”.
Kjo Federatë është totalisht e ligjshme dhe njihet nga institucionet sportive të shtetit dhe prej 10 Janarit 2014 është anëtare e Federatës Botërore të “Kick-Boxing”. Për këtë anëtarësim është vënë në dijeni dhe ministria e Arsimit dhe Sportit por edhe “KOKSH”.
Mirëpo thuajse 1 vit nga krijimi i kësaj federate, një tjetër federatë e dytë del në skenë. Përmes përdorimit të dokumenteve fals, Elvis Bejko, ka shkuar në Gjykatën e Tiranës dhe regjistron përmes një vendimi Gjykate, Federatën Shqiptare të “Kick-Boxing”.
“…brenda një kohe fare të shkurtër, u krijuan dy Federata Paralele të Karatesë në Shqipëri. Ku e dyta është rregjistruar në Gjykatë, por nuk është pranuar në Ministrinë e Arsimit dhe Sportit si dhe nuk është regjistruar pranë “KOKSH”. Pasi një Federatë e tillë është regjistruar njëherë në vitin 2012 dhe s’mund të hapet një e dytë, për të njëjtin objekt. Është njësoj sikur të kesh dy federata Futbolli në Shqipëri…”-shprehet në kallëzimin e tij kompioni i botës në “Kick-Boxing”.
Falsifikatorët kanë përdorur dy urdhra të lëshuara nga ish-ministri i Arsimit dhe Sportit, Visar Zhiti. Përmes këtyre dy urdhra pa vulë institucioni, pa numër protokolli dhe me gabime drejtshkrimore, është regjistruar në gjykatën e Tiranës, shoqata e dytë e karatesë.
“…të dy urdhrat janë me gabime kuptimore dhe drejtshkrimore, saqë duket e vështirë të kenë dalë nga një zyrë ministrie…”-thuhet në kallëzimin penal.
Për më tepër dhe vetë ish-ministri Visar Zhiti, ka mohuar firmosjen e këtyre dy urdhrave, pasi për vetë standardin e tij si shkrimtar, nuk do bënte kurrë gabime në artikulim dhe drejtshkrimin e këtyre urdhrave.
Por mbi të gjitha në arkivat e Ministrisë së Arsimit dhe Sportit, nuk gjenden këta urdhra, dhe as në Ministrinë e Ekonomisë, Kulturës dhe Inovacionit, por gjenden vetëm dokumentet e federatës që drejton Arbis Vjerdha./ Elton Qyno – Syri.net
