Përfundon seanca në Gjykatën e Lezhës, ku mbrojtja ka paraqitur në konkluzionet e saj për portugezin Ruben Saraiva, të akuzuar për vrasjen në Shëngjin në prill të 2023 të biznesmenit Ardjan Nikulaj.
Avokati Kujtim Çakrani ka deklaruar se nuk ka asnjë provë që e implikojnë klientin e tij, duke shtuar se Ruben Saraiva është diskriminuar gjatë gjithë kësaj periudhe nga Drejtoria e Burgjeve, gjë që është pohuar edhe nga ana e tij sot në gjykatë.
Sipas avokatit Çakrani, klienti i tij Ruben Saraiva ka deklaruar se po mbahet padrejtësisht në burg pasi policia dhe prokuroria e di mirë kush janë vrasësit e vërtetë.
Seanca e radhës do të jetë më 25 mars, ku pritet të jepet vendimi. Më herët, Prokuroria e Lezhës ka dhënë pretencën, duke kërkuar dënimin me burgim të përjetshëm për shtetasin portugez.
Ngjarja
Ngjarja e rëndë ndodhi më 19 prill 2023, në qytetin e Shëngjinit, brenda lokalit të biznesmenit Ardjan Nikulaj.
Rreth orës 13:30, autori hyri në ambientet e lokalit dhe pasi u afrua pranë tavolinës ku ndodhej Nikulaj, ai qëlloi disa herë me armë zjarri, duke e lënë të vdekur në vend.
Autoritetet nisën hetimet dhe identifikuan portugezin Ruben Saraiva si ekzekutor të ngjarjes.
Dyshohet se vrasja ka lidhje me konflikte të hershme mes familjes Nikulaj dhe një familjeje tjetër në zonë, ku ekzekutori u përdor si person i jashtëm për të kryer atentatin.
