Projekti i shumëpërfolur i Korridorit VIII, i cilësuar si arteria jetike që do të lidhë Adriatikun me Detin e Zi, po përballet sot me një krizë identiteti dhe stabiliteti që kërcënon ta kthejë atë në një tjetër kantier pa afat.
Në krye qëndron vendimi për zhvendosjen e Portit të Durrësit.
Teksa qeveria shqiptare po zbaton një kontratë për të kthyer Portin e Durrësit në një port jahtesh, nga ana tjetër janë krijuar shumë vonesa për të ndërtuar portin e ri të Porto Romanos.
Projekti i shndërrimit të Portit të Durrësit në një marinë jahtesh, i njohur zyrtarisht si “Durrës Yachts & Marina”, është një nga kontratat më komplekse.
Kontrata është lidhur mes shtetit shqiptar dhe kompanisë “Eagle Hills Real Estate Development”, një kompani private investimesh dhe zhvillimi imobiliar me qendër në Abu Dhabi, që zotërohet nga Mohamed Alabbar.
Projekti shtrihet në rreth 450 hektarë të truallit portual ekzistues.
Ndërsa projekti i jahteve në portin e vjetër po ecën me ritme të shpejta shitjesh, Porti i Ri në Porto Romano ka ngecur në procedurat tenderit që nuk po mund të zgjedhin një fitues prej dy vitesh.
Në këtë mënyrë, Korridorit VIII i është rrezikuar “koka”, teksa ekspertët rendisin plot gabime në strukturën dhe segmentet e rrugës.
Duhet ndryshuar tërësisht projekti për Korridorin VIII
Ekspertët e fushës janë të shqetësuar se tentativa për të ndërtuar rrugën mbi shpatet e gërryera është jo vetëm e kushtueshme, por edhe e rrezikshme për jetën e udhëtarëve në të ardhmen.
Ata thanë se duhet anuluar projekti ekzistues që bazohet në mbushje dhe gërmim shpatesh, tashmë të destabilizuar nga gërryerjet dhe duhet riprojektimi nga e para i këtij segmenti, duke përdorur viadukte që janë ura të larta.
Kjo metodë, sipas tyre, do të lejonte rrugën të kalonte këtë problematikë ku ndodhet pa prekur më tej shtratin e lumit dhe pa rrezikuar shembjen e mëtejshme të malit.
“Nuk mund të luftohet me natyrën kur e kemi plagosur atë kaq rëndë. Çdo qindarkë e hedhur në muret pritëse aktuale është para e hedhur në lumë. Duhet ndryshim radikal i projektit”, tha burimi në ARRSH.
Ekspertët bëjnë thirrje për ndërhyrje të menjëhershme të institucioneve mjedisore dhe Ministrisë së Infrastrukturës për të ndalur këtë katastrofë përpara se dëmet të bëhen të pakthyeshme.
Devijimet me kosto dhe të panevojshme të Korridorit VIII
Korridori VIII është një histori e gjatë dhe së fundmi e ngatërruar me projekte dhe studime që më shumë duket sikur po e sabotojnë projektin.
Kur Korridori VIII u riklasifikua në Rrjetin kryesor Europian të Transportit tre vite më parë qeveria shqiptare bëri një rifreskim projektit, duke zhvendosur në një trase krejt të re segmentin e fundit në territorin shqiptar, nga ura e Bushtricës në Qukës për të dalë afërsisht pranë grykës së quajtur “Shkalla e Skënderbeut” në kufi me Maqedoninë e Veriut, në gjatësi 10 kilometra.
Gjurma e re kalon në një lartësi gati 900 metra në malet e Mënikut drejt kufirit me Maqedoninë e Veriut duke e bërë shumë të vështirë mirëmbajtjen pas përfundimit të tij, teksa variantet e tjera kalojnë në një lartësi rreth 600 metër.
Profesor Kaba tha se traseja e re, përveçse me kosto të lartë, e zgjat në mënyrë të panevojshme Korridorin. Varianti për të cilin është rënë dakord me palën maqedonase, pasi kalon nëpërmjet një terreni të vështirë nga Shqipëria, në Maqedoninë e Veriut bën një kthesë mjaft të gjatë për t’u kthyer sërish në Qafë-Thanë.
Gjithashtu profesor Kaba tha se është bërë një gabim i madh në projektin e By Pass-it të Elbasanit, i cili kishte plot variante pa tunel dhe kosto të lira, por qeveria ka gjetur një zgjidhje absurde me një tunel 2 kilometra, që rrit kostot jo vetëm gjatë ndërtimit por edhe në mirëmbajtje.
Gjithashtu ka një koncept të gabuar në akset që duhet të përfundojnë të parat. Ndërtimi i segmenteve pas Elbasanit, pa ndërtuar me parë by pass-et e Tiranës dhe Elbasanit nuk kanë asnjë vlerë.
Ekspertët e infrastrukturës rrugore janë mjaft të shqetësuar për atë që po ndodh realisht në investimet rrugore. /Monitor
