Deputetja e Partisë Demokratike, Ina Zhupa, ka reaguar pas debatit të ndodhur në sallën e Kuvendit mes Taulant Ballës dhe Albana Vokshit, duke e cilësuar situatën si një shkelje të rëndë të etikës dhe dinjitetit njerëzor.
Në mbledhjen e Komisionit për Evropën dhe Punët e Jashtme Zhupa u shpreh se është përdorur një gjuhë e papranueshme ndaj deputetes Vokshi, duke theksuar se sjellje të tilla nuk duhet të ndodhin në institucionin më të lartë përfaqësues të qytetarëve.
Sipas saj, duhet të merren masa për përjashtimin e Taulant Ballës nga punimet e Kuvendit për shkak të gjuhës fyese.
“Dje në sallën e Kuvendit, në një mënyrë të paprecedentë dhe jashtë çdo norme morale e ligjore të rregullores, bashkëjetesës brenda një salle, që duhet të ishte më e larta e përfaqësimit të qytetarëve, Balla ka cenuar dhe prekur dinjitetin njerëzor të koleges tonë, Albana Vokshi. Ky kuvend miratoi me goxha propagandë një ligj që ishte edhe ligj për të diskutuar por thelbi që donit ju ishte dhuna ndaj grave. Minimumi ky Komision, që ka për nënkryetare Vokshin të mbajë një qëndrim dhe të distancohet nga dhuna.
Të dalë me një deklaratë të përbashkët si komision, që mbështet ligjin e barazisë gjinore, të mbështesë atë që thotë progres raporti për Shqipërinë. Nëse ky komision që nuk e kalon dot mesazhin që kur cenohet nënkryetarja duke cenuar edhe standartet më të larta të bashkëjetesës normale e morale brenda kuvendit, duhet të distancohet, të mbajë një qëndrim, të kërkojë që kuvendi të mbajë një qëndrim dhe të merren masa ndaj zotit Balla për fjalorin e përdorur në sallën e Kuvendit. U cenua një zonjë, nënë e motër. Zonja Vokshi ka dy vajza në shtëpi që e ndjekin kuvend dhe nuk mund të kalojë nga ai kuvend ato mesazhe që prekin dinjitetin njerëzor të kujtdo.”, tha Zhupa, duke shtuar më tej:
“Propozimi për përjashtimin e zotit Balla duhet të jetë propozim i të gjitha zonjave dhe demokrate, ta firmosim së bashku dhe të jetë akt qytetarie për të kërkuar reflektimin e mëtejshëm të të gjitha palëve”,- u shpreh Zhupa.
LEXO EDHE:
“Kam numrin 0900″/ Fyeu Albana Vokshin, deputetët e PD nxjerrin nga salla Taulant Ballën
