Një qytetar ka raportuar për një situatë shqetësuese gjatë udhëtimit nga Pisa drejt Tiranës, duke denoncuar sjelljen diskriminuese të stafit të WizzAir ndaj udhëtarëve shqiptarë.
Udhëtarët janë ofenduar nga punonjëset e Check-In dhe nuk u është lejuar të udhëtojnë nëse nuk paguajnë 78 euro shtesë për çantat e shpinës.
Ai thotë se duke bërtitur dhe kërcënuar se do njoftojnë policinë, punonjëset e aeroportit nuk kanë lejuar shqiptarët të udhëtojnë, madje kanë kthyer edhe disa moshuarit, pa u interesuar se janë me bileta dhe të rregullt. Madje ai shton se edhe në rastet kur çanta është e vogël, disa udhëtarë janë detyruar të paguajnë ekstra për të udhëtuar.
Qytetari denoncon për JOQ se këto praktika diskriminuese janë shqetësuese ndaj shqiptarëve dhe transparenca e WizzAir për tarifat e bagazheve lë shumë për të dëshiruar.
Vlen të thuhet se ky nuk është rasti i vetëm që WizzAir, një kompani “low cost”, abuzon me udhëtarët duke i detyruar të paguajnë për bagazhet e dorës ndërkohë për vonesat, shtyrjet dhe anulimet e fluturimeve s’mban përgjegjësi.
Ndërkohë, kompania Wizz Air ka reaguar dhe sqaruar rrethanat që lidhen me situatën që shihet në videon e mësipërme. WizzAir thekson se procedurat e imbarkimit në aeroporte ndjekin rregulla të përcaktuara qartë të cilat u komunikohen paraprakisht pasagjerëve.
Reagimi:
Procedurat e imbarkimit në aeroporte ndjekin rregulla të përcaktuara qartë, të cilat u komunikohen paraprakisht pasagjerëve. Të gjithë pasagjerët duhet të respektojnë udhëzimet e imbarkimit, përfshirë edhe orën përfundimtare të imbarkimit të shënuar në kartën e imbarkimit dhe të njoftuar në aeroport. Këto procedura janë vendosur për të siguruar përpikmërinë dhe funksionimin e rregullt të të gjitha fluturimeve, ndërkohë që procesi i imbarkimit zhvillohet në koordinim me stafin e shërbimit tokësor të aeroportit, i cili është përgjegjës për menaxhimin e portës së imbarkimit dhe për të siguruar që procedurat ndiqen në përputhje me rregullat e aeroportit.
Wizz Air synon gjithmonë të mbështesë pasagjerët dhe të ofrojë një eksperiencë udhëtimi sa më të qetë. Ne i inkurajojmë të gjithë udhëtarët të paraqiten në kohë në portë dhe të ndjekin me kujdes udhëzimet e imbarkimit për të shmangur çdo shqetësim.
Linja ajrore mbetet e përkushtuar ndaj komunikimit transparent dhe ofrimit të udhëtimeve të sigurta, të besueshme dhe efikase për të gjithë pasagjerët.
