Drejtoresha e QSUT-së, Anxhela Paparizo, ka mohuar këtë të enjte mundësinë se në këtë qendër spitalore ka korrupsion mes mjekëve.
Në një konferencë për mediat, me Ministren Evis Sala, Paparazio u pyet nga gazetarët në lidhje me çështjen e korrupsionit brenda spitaleve, ku pacientët ndonjëherë detyrohen të paguajnë për shërbime që duhet të jenë falas.
Në përgjigje, ajo tha se nuk është në dijeni për raste të tilla dhe se deri më tani nuk ka pasur asnjë denoncim zyrtar pranë strukturave përkatëse për marrje parash nga ana e mjekëve.
“Në dijeninë time nuk kam njohur për marrje lekësh, nuk kemi asnjë denoncim në strukturat përkatëse për marrje lekësh nga mjekët”, është shprehur ajo.
Megjithatë deklarata e drejtoreshës bie ndesh me raportimet e vazhdueshme dhe ankesat publike të pacientëve ndër vite. Prej kohësh, ky institucion është përfshirë në polemika për mungesë medikamentesh dhe dyshime për pagesa informale ndaj mjekëve, të cilët nuk ofrojnë shërbime nëse pacientët nuk paguajnë para.
