Baza e Forcave Ajrore Mbretërore të Mbretërisë së Bashkuar, RAF, në Qipro ka qenë objekt i një sulmi të dyshuar me dron iranian gjatë natës, njoftuan presidenti i ishullit dhe Ministria britanike e Mbrojtjes. Kryeministri Keir Starmer tha se Mbretëria e Bashkuar do t’i lejojë Shtetet e Bashkuara të përdorin bazat e saj për të sulmuar Iranin.
“Të gjitha shërbimet kompetente të republikës janë në gatishmëri dhe në përgatitje të plotë operacionale,” tha presidenti i Qipros, Nikos Christodoulides, në një fjalim të hënën, duke shtuar se një mjet ajror pa pilot i tipit Shahed shkaktoi dëme të vogla kur u rrëzua në objektet ushtarake në orën 23:03. “Dua të jem i qartë, vendi ynë nuk merr pjesë në asnjë mënyrë dhe nuk ka ndërmend të jetë pjesë e ndonjë operacioni ushtarak”, tha ai.
Akrotiri, në jugperëndim të qytetit bregdetar Limassol, është një nga dy bazat që Mbretëria e Bashkuar ka mbajtur në ish-koloninë e saj që nga pavarësia në vitin 1960. Përveç objekteve ushtarake, aty jetojnë edhe familjet e personelit në shërbim.
Autoritetet e bazës këshilluan banorët pranë Akrotirit të qëndrojnë në strehim deri në njoftim të dytë pas një “goditjeje të dyshuar nga dronë”, duke shtuar se personeli jo thelbësor do të shpërndahet, ndërsa objektet e tjera britanike do të funksionojnë normalisht. Akrotiri, i vendosur në një gadishull katror në skajin jugor të Qipros, është përdorur më parë për operacione ushtarake në Irak, Siri dhe Jemen.
Sulmi herët në mëngjes i së hënës, i pari ndaj kësaj baze ushtarake, shënon një përshkallëzim të konfliktit, i cili ka hyrë në ditën e tretë. Ministria britanike e Mbrojtjes konfirmoi sulmin, duke thënë se forcat e saj po menaxhonin një “situatë aktive”. “Mbrojtja e forcave tona në rajon është në nivelin më të lartë dhe baza ka reaguar për të mbrojtur njerëzit tanë,” tha një zëdhënës i ministrisë në një deklaratë.
Nuk ishte menjëherë e qartë nga ishte lëshuar droni i dyshuar Shahed, i cili erdhi pasi Starmer tha se Mbretëria e Bashkuar do ta ndihmonte Uashingtonin në luftën kundër Iranit. Fillimisht, Londra kishte mohuar aksesin për shkak të shqetësimeve se mund të shkelte të drejtën ndërkombëtare.
Dy burime, duke folur në kushte anonimiteti, i thanë agjencisë Reuters se bazat britanike kishin kapur një dron të dytë. Në reagimin ndaj sulmit me dron, presidentja e Komisionit Europian, Ursula von der Leyen, tha se blloku qëndron përkrah shteteve të tij anëtare përballë çdo kërcënimi. “Edhe pse Republika e Qipros nuk ishte objektiv, më lejoni të jem e qartë: ne qëndrojmë kolektivisht, me vendosmëri dhe pa mëdyshje me shtetet tona anëtare përballë çdo kërcënimi,” shkroi ajo në X.
Megjithëse bazat konsiderohen territor sovran britanik, vetë Qipro është anëtare e Bashkimit Europian dhe aktualisht mban presidencën e Këshillit të Bashkimit Europian, e cila është një nga institucionet legjislative të Unionit, bashkë me Parlamentin Europian.
