Kreu i grupit Parlamentar të PD, Gazment Bardhi, tha sot nga konferenca për mediat, se ditën që do mbahet seanca për kërkesën e SPAK që do heqjen e imunitetit të Belinda Ballukut, opozita do të zhvillojë protestë para Parlamentit.
Ai u shpreh se nëse Parlamenti nuk i heq imunitetit Ballukut, zona përreth, sipas tij do të kthehet në bunker me protestues që nuk do ndalen nëse nuk i hiqet imuniteti.
Sipas Bardhit, shkarkimi i Ballukut, është si rrjedhojë e dështimit të Edi Ramës, i cili, siç thotë Bardhi, po mbron veten e tij nga aferat dhe skandalet korruptive.
“Jemi dëshmitarë që për gati dy muaj e gjysmë, Rama tentoi të ishte zyra e avokatisë së Ballukut. Dhe siç dukej, nuk kishte mbetur asgjë tjetër veç shkarkimit të saj. Deklarata të tilla janë sinjale të asaj që ka thënë PD, se Rama po mbron veten e tij, jo vetëm Ballukun. Vërtetohet se ai është në dosjen e SPAK-ut. Ai po mbahet peng nga Balluku, sepse nëse ajo shkon në burg, do të shkojë edhe ai pas saj.
Ky do të ishte momenti më i rëndë në demokraci, që do të vinte në dyshim ekzistencën e shtetit ligjor. Ndaj, sot dua që përmes kësaj konference për shtyp të njoftoj se ditën kur Kuvendi të shqyrtojë mandatin apo imunitetin e Ballukut, PD do të thërrasë në protestë qytetarët para selisë së Kuvendit.
Nëse shkon skenari i refuzimit të kërkesës së SPAK-ut, qytetarët do ta trajtojnë Kuvendin si bunker ku janë strehuar të korruptuarit, i cili do të duhet edhe të shembet. Ditën kur Kuvendi shqyrton kërkesën për mandatin, qytetarët janë të ftuar në protestë para selisë së Kuvendit. Që nga ai moment, nëse mbahet qëndrim pro Ballukut, ai institucion do të quhet bunker i të korruptuarve.”, tha ai.
