Presidenti i SHBA-së, Donald Trump, ka paralajmëruar se vendet që, sipas tij, “luajnë lojëra” me marrëveshjet tregtare të arritura së fundmi me Shtetet e Bashkuara, do të përballen me tarifa edhe më të larta.
Reagimi i tij vjen pasi Gjykata e Lartë e SHBA rrëzoi tarifat e emergjencës të vendosura nga administrata, duke i shpallur ato të pavlefshme sipas Aktit Ndërkombëtar të Fuqive Ekonomike të Emergjencës.
Në një seri postimesh në Truth Social, Trump u shpreh se çdo vend që përpiqet të përfitojë nga vendimi i gjykatës do të përballet me masa më të ashpra tregtare. Ai theksoi se ka autoritete të tjera ligjore për të vendosur tarifa “më të fuqishme dhe me siguri ligjore”.
Presidenti amerikan sugjeroi gjithashtu mundësinë e vendosjes së tarifave të reja në formë licence për partnerët tregtarë, pa dhënë detaje konkrete.
Ndërkohë, në Brussels, Parlamenti Evropian shtyu votimin për marrëveshjen tregtare BE–SHBA, pasi Trump njoftoi një taksë të përkohshme importi.
Fillimisht, ai shpalli një tarifë 10% sipas Seksionit 122 të Aktit të Tregtisë të vitit 1974, e cila hyri në fuqi menjëherë pas mesnatës të martën. Më pas, ai paralajmëroi rritjen e saj në 15%, që është maksimumi i lejuar nga ligji. Deri tani është firmosur vetëm urdhri për tarifën 10%, ndërsa mbetet e paqartë kur do të hyjë në fuqi norma më e lartë.
