Kryetari i Partisë Demokratike, Sali Berisha thotë se dënon qëndrimin e socialistëve në Këshillin e Mandateve, që sipas tij, morën urdhër nga Rama që të votojnë kundër kërkesës së SPAK për heqjen e imunitetit të Belinda Ballukut.
Në konferencë me gazetarët, Berisha deklaroi se nuk i heq imunitetin Ballukut, pasi e di që pas saj edhe ai e ka vendin tek drejtësia.
“Rama duhet të largohet menjëherë nga pushteti. Dënoj qëndrimin dhe urdhrin e tij dje, ndaj vasaleve të tij që të mos votojnë kërkesën e prokurorisë për heqjen e imunitetit të Belinda Ballukut.
Ky është rasti i tretë në të cilin Edi Rama është vetë direkt i implikuar. Ai nuk hoqi imunitetin e Saimir Tahirit, të ndrikull Xhaçkës, sepse është aksioner në vjedhjen e 10 mijë metra katror tokë publike. Ai e din që fill prapa Ballukut shkon ai”, deklaroi kreu i PD.
Sipas tij, Ramën nuk e heq dot drejtësia, por populli shqiptar: “Do shembet si kulti satanik i Enver Hoxhës”, deklaroi ai.
