Një aksident rrugor është shënuar pasditen e sotme në dalje drejt superstradës, pranë zonës së Ishull Lezhës.
Sipas informacioneve paraprake, një automjet është përplasur me një motomjet, duke shkaktuar plagosjen e drejtuesit të motorit. I dëmtuari është transportuar me urgjencë në Spitalin Rajonal të Lezhës, ku po merr ndihmën e nevojshme mjekësore.
Bëhet me dije se motomjeti po lëvizte në drejtim të Lezhës, ndërsa automjeti, që vinte nga qyteti i Lezhës, ka tentuar të futet në rrugën dalëse drejt superstradës. Në këtë moment ka ndodhur edhe përplasja mes dy mjeteve.
Qarkullimi i automjeteve në zonë ka qenë përkohësisht i vështirësuar, ndërsa hetimet vijojnë.
