Gazetari Mentor Kikia ka komentuar në një emision televiziv përbërjen e ashtuquajturit “Bord i Paqes”, duke vënë në pikëpyetje interesat reale të vendeve që janë bërë pjesë e tij.
Sipas tij, deri në këtë fazë, vetëm Kosova duket se ka një interes të drejtpërdrejtë shtetëror.
“Nga këta që janë deri tani në Bordin e Paqes, vetëm Kosova është shteti që përfiton, apo ka interesa reale si shtet,” shprehet Kikia.
Ai thekson se për Prishtinën, marrëdhëniet me Shtetet e Bashkuara mbeten thelbësore për sigurinë dhe të ardhmen ndërkombëtare të vendit.
“Sepse nga raportet me SHBA varet ende siguria, integriteti territorial dhe lufta për t’u anëtarësuar në institucionet ndërkombëtare,” deklaron gazetari.
Sa i përket vendeve të tjera pjesëmarrëse, Kikia shprehet kritik, duke i cilësuar si shtete me problematika demokratike dhe me udhëheqës afatgjatë në pushtet.
“Të tjerët janë udhëheqës në vende jo demokratike që kanë nga 20 vjet në pushtet dhe kanë shkuar të paraqiten tek ‘komandanti’, se nuk i dihet si shkon puna. Kuptohet, jo me duar bosh,” shprehet ai.
Në analizën e tij, gazetari sjell në vëmendje edhe rastin e Venezuelës, si shembull të marrëdhënieve me SHBA-në. “Venezuela tregoi se ‘nuk bëhet shaka me miellin e gjermanit’,” thotë Kikia.
“Kaq është Bordi i Paqes,” përfundon ai, duke i ftuar qytetarët të ndjekin zhvillimet dhe raportimet në mediat shqiptare për më shumë informacion.
