Një ngjarje tragjike ka ndodhur në Itali, ku një 46-vjeçar shqiptar ka humbur jetën gjatë një tentative vjedhjeje në një vilë private.
Sipas informacioneve paraprake, shqiptari kishte hyrë në banesë së bashku me dy bashkëpunëtorë. Pronarët e shtëpisë i kanë zbuluar dhe kanë qëlluar me armë zjarri në ajër, duke shkaktuar panik tek hajdutët, të cilët u larguan me vrap.
Gjatë arratisjes, 46-vjeçari është rrëzuar nga një ballkon me lartësi rreth dy metra dhe ka pësuar një dëmtim të rëndë në këmbë. Dyshohet se çarja e thellë ka shkaktuar hemorragji të madhe, e cila i mori jetën pak minuta më vonë. Ai arriti të vraponte rreth 20 metra përpara se të rrëzohej në tokë, ku ndërroi jetë.
Autoritetet italiane kanë nisur hetimet për zbardhjen e plotë të rrethanave të ngjarjes. Karabinierët janë në kërkim të dy personave të tjerë që dyshohet se ishin pjesë e grupit.
Gjithashtu, dyshohet se automjeti me të cilin autorët iu afruan zonës mund të jetë fshehur në afërsi dhe se persona të tjerë mund të kenë qenë në pritje. Hetimet pritet të zbulojnë nëse bëhet fjalë për një grup të organizuar./Il Mattino/
