Gjykata e Posaçme ka shpallur fajtorë dhe ka dënuar me burg 7 anëtarët e një grupi të huajsh të trafikut të klandestinëve, të cilët në vitin 2023 sulmuan me armë policët kufitarë në Morinë.
Behet fjalë për pesë shtetas sirianë dhe dy algjerianëve të akuzuar për organizim të trafikut të emigrantëve nga Greqia drejt vendeve të Bashkimit Evropian, si dhe për tentativën e vrasjes së pesë punonjësve të policisë, ndaj të cilëve hapën zjarr kur ishin në aksion, ngjarje e ndodhur më 25 maj të vitit 2023, në piken kufitare ‘Morinë’, Kukës.
Sipas organit të akuzës janë shpallur fajtorë dhe janë dënuar:
-Sultan Grimash alias Sadaak Guremache alias Junes Alma – 35 vjet burgim
-Ayoub Bahhoo – 35 vjet burgim.
-Muhammed Radën alias Muhamed Radouë alias Radvan Radvan – 35 vjet burgim
-Rabi Lqadi alias Rabi El-Kadi – 8 vjet burgim.
-Muhammed Shehab alias Mohamed Al Uthman Shaab alias Mohamed Outman – 35 vjet burgim
-Muhammed Nasir alias Nouh Graie – 12 vjet burgim.
-Nagid Alabdalah alias Abu Gira – 8 vjet burgim
SPAK mbylli hetimet dhe dërgoi kërkesën për gjykim në Gjykatën e Posaçme 7 trafikantët e klandestinëve që hapën zjarr ndaj policisë kufitare në Morinë më 25 maj 2023, të cilët po monitoronin zonën për kapjen e personave të armatosur, duke rrezikuar rëndë jetën e tyre dhe të banorëve.
Sipas organit të akuzës, në 2023, ata kanë jetuar mes Morinës dhe Kosovës, duke hyrë dhe dalë në mënyrë të paligjshme, kanë mbajtur armë, kanë bashkëpunuar shqiptarë, kosovarë dhe të tjerë të huaj duke organizuar dhënie ndihme për kalim të paligjshëm në disa raste. Këta dy grupe kriminale bashkëpunojnë, edhe me grupe që veprojnë në shtete të tjera, që nga vendi i origjinës, vijuar më tej edhe në Greqi, Turqi, Kosovë, Serbi, Gjermani.
Një pjesë e tyre rezultojnë se kanë jetuar në Shqipëri të paktën nga viti 2019, janë kapur disa herë me emigrantë të tjerë në territorin shqiptar, duke u hequr edhe ata si emigrantë, dhe duke mos u bërë e mundur identifikimi i tyre si organizues dhe gjatë intervistimeve, kanë dhënë gjeneralitete të rreme.
Ata akuzohen për veprat penale: “Vrasja e punonjësve të Policisë së Shtetit”, kryer në bashkëpunim, “Vrasja me dashje”, “Trafikimi i armëve dhe i municionit”, “Ndihma për kalim të paligjshëm të kufijve”, si dhe “Grup i strkturuar kriminal”.
