Kolegji i Posaçëm i Apelimit, KPA shpalli të enjten më 12 shkurt vendimin për pushimin e çështjes së vetingut për gjyqtaren e Tiranës, Vjollca Spahiu.
Kolegji e konsideroi kërkimin përfundimtar të drejtuesit të SPAK për lënien në fuqi të konfirmimit në detyrë të subjektit të rivlerësimit, të barazvlefshëm me heqjen dorë nga shkaqet e ankimit. Sipas KPA, pas kërkimit përfundimtar të drejtuesit të SPAK, për konfirmimin e subjektit, çështja ka mbetur pa objekt e për rrjedhojë duhet të pushohet. Për shkak të pushimit të gjykimit në Kolegj, vendimi i Komisionit të Pavarur të Kualifikimit, KPK për konfirmimin e subjektit mori formë të prerë.
Gjyqtarja Vjollca Spahiu u konfirmua në detyrë nga Komisioni i Pavarur i Kualifikimit, KPK më 28 qershor të vitit 2024, pas një procesi rivlerësimi të fokusuar tek pasuria e saj dhe e bashkëshortit. Por, vendimarrja e KPK nuk e gjet e drejtë nga Komisionerja Publike, Irena Nino, e cila e ankimoi duke ngritur pretendime për një dyqan dhe një apartament në Tiranë.
Pas shqyrtimit të çështjes në Kolegj, prokurori Adnan Xholi, i cili përfaqësoi drejtuesin e SPAK në këtë çështje, i cilësoi bindëse shumicën e pretendimeve të subjektit dhe duke ju referuar parimit të objektivitetit e proporcionalitetit kërkoi lënien në fuqi të konfirmimit në detyrë të gjyqtares Spahiu. Subjekti i cilësoi të drejtë konkluzionet përfundimtare të drejtuesit të SPAK dhe kërkoi pushimin e çështjes.
Vjollca Spahiu e ka filluar karrierën në sistemin e drejtësisë në vitin 1995 dhe ka punuar fillimisht si gjyqtare në Kukës. Prej vitit 2014, Spahiu e ushtron funksionin në Gjykatën e Tiranës./BIRN
