Aulon Kalaja, ka vijuar përballjen në gjykatë me kryebashkiakun e arrestuar të Tiranës, Erion Veliaj, i cili e ka paditur për shpifje.
Këtë të mërkurë është mbajtur sërish seanca në Gjykatën e Tiranës (Dhoma Penale), ku sipas Kalasë janë shqyrtuar një pjesë e konsiderueshme e provave të paraqitura nga ana e tij dhe palës mbrojtëse.
Sipas tij, përmes materialeve audio dhe video ka arritur të vërtetojë para trupës gjykuese të gjitha deklaratat e bëra më herët në media, ndërkohë që seanca e radhës është caktuar më 19 shkurt ora 14:00.
“Seanca ishte për shqyrtimin e provave për pretendimet e Kryetarit të Bashkisë Tiranë, Erion Veliaj, ndaj meje për shpifje. Deri tani janë zhvilluar 8 seanca. Me video dhe audio kam vërtetuar para gjykatës të gjitha çfarë kam shprehur në media dhe nuk jam tërhequr nga asnjë deklaratë,” deklaroi Kalaja.
Ai shton më tej se padia e ngritur nga Veliaj është sipas tij një padi strategjike.
“Kjo është padi strategjike nga ana e zotit Veliaj, sepse hallin që ai ka nuk ia zgjidh dot,” u shpreh ai.
Kujtojmë se Aulon Kalaja, është paditur për shpifje nga Kryetari i arrestuar i Bashkisë së Tiranës, Erion Veliaj, pasi Kalaja u shpreh në një emision televiziv se Veliaj, në fillimet e tij politike dhe gjatë pjesëmarrjes në lëvizjen “Mjaft”, ka pasur sjellje që ai i konsideron të papërshtatshme dhe që lidhen me ofrimin e shërbimeve ndaj ambasadave të huaja.
Ai ka thënë se Veliaj dhe disa bashkëpunëtorë të tij, duke përfshirë Arbi Maznikun, Endri Fugan dhe vëllain e Veliajt, janë veshur si femra dhe kanë marrë pjesë në ahengje që sipas Kalasë kanë pasur karakter seksual.
