Nga Elton Qyno
Henrik Hoxhaj, njëri nga bashkëpunëtorët më të ngushtë të killerit me pagesë, Nuredin Dumanit, dhe njëherësh bashkëpuntori i parë i SPAK, (por më pas i refuzuar nga prokuroria), ka vijuar dëshminë e tij, para gjykatës së posaçme, duke treguar dy episode e planeve për të kryer vrasjen e Kastriot alias Oti Kila.
Në dy raste vrasja u planifikua të kryehej në Elbasan. Por sipas përgjigjeve që Hoxhaj, u jepte prokurorit Behar Dibra, vrasja e Oti Kilës, ka dështuar për dy arsye.
Njëra lidhet me arrestimin e “Krymit”, duke ju referuar Erjon Alibejt, i cili u kap nga prokuroria e Elbasanit për vrasjen e Regis Runaj.
Sipas rrëfimit të Henrik Hoxhaj, punën e vrasjes së Oti Kilës e kërkonte Erjon Alibej, pasi Oti Kila ishte në listën e gjatë të personave që do vriteshin në Elbasan, listë të cilën e ka bërë Nuredini dhe “Krymi”.
Ndërsa herën e dytë që dështoi vrasja e Oti Kilës, lidhet me faktin se ditën kur Hoxhaj së bashku me Nuredinin, kanë shkuar në Elbasan për të mbaruar punën e Otit, ka mbetur i plagosur rëndë, Nuredin Dumani.
Kujtojmë se Henrik Hoxhaj është i penduari i parë i SPAK, që ka folur për një zinxhir vrasjesh me pagesë të kryer në trekëndëshin Elbasan, Tiranë, Durrës. Hoxhaj fillimisht u pendua nga prokurori i Elbasanit, Kreshnik Ajazi, duke u marë në pyetje nga kryepolici Ilir Proda.
Më pas Hoxhaj u transferua në SPAK, duke dhënë deklarime shtesë për prokurorët e SPAK-ut. Pas dëshmisë së tij, u pendua më pas dhe Nuredin Dumani, Skerdi Tasi dhe më tej Erjon Alibej. Pendesa e Skerdi Tasit, solli heqjen e statusit të bashkëpuntorit për Henrik Hoxhaj, duke e trajtuar atë njësoj si personat e tjerë të pandehur.
Në rrëfimin që Hoxhaj bëri para gjykatës, ai tregoi se vrasjen e Oti Kilës, e kërkonte “Krymi”, pasi ai dhe Nuredini kishin bërë listën se kush duhej të vritej në Elbasan.
Unë dhe Nuredini kemi filluar punën për ta vrarë Oti Kilën në Elbasan. “…Në përgatitjen e parë, Nuredin Dumani, më dërgonte foto të gruas së Oti Kilës, foto të vetë Oti Kilës me makina të bukura, pra informacione që unë ta gjeja sa më shpejt Otin për të mbaruar punë…por Otin nuk po e gjenim dot…”.
Ndërhyn i pandehuri Petrit Qoli duke pohuar pa lejën e gjykatës dhe i drejtohet Behar Dibrës me fjalët se:
”…o prokuror kaq nuk e kupton, dëshira për të vrarë Oti Kilën është për punë femrash të Erjon Alibej. Kaq kuptoje se na ke bërë të vjellim gjak këtu brenda.Unë propozoj zonja gjyqtare që ditën kur është plagosur Nuredin Dumani, ta shpallim ditë zie kombëtare. Pasi nëse nuk do kishte Nuredin, nuk do kishte këtë suskses SPAK. Prokuror ti e di, të kam vëlla, por këtu e ke bërë baltë, shkurt e ke dhj…ë fare….”.
Plasin të qeshurat në sallën e gjyqit. Gjyqtarja Engjëllushe Tahiri i tërheq vëmendjen të pandehurit Petrit Qoli, i cili largohet nga salla e gjykimit. Ndërkohë vijohet me dëshminë e Henrik Hoxhaj.
Sipas Hoxhaj në kërkim e sipër të Oti Kilës, plani për vrasjen e tij u braktis pasi gjatë kësaj kohe në Elbasan u arrestua “Krymi” lidhur me vrasjen e Regis Runaj dhe në ndërpremë kërkimin dhe braktisëm planin për vrasje.
“…braktisja e planit erdhi edhe si pasojë se pas kapjes së Krymit, Nuredin Dumani iku në Kosovë dhe unë mbeta vetë. Nuk kisha me cilin ta bëja vrasjen ndaj e lamë…”-ka treguar Henrik Hoxhaj para gjykatës së Posaçme.
Në rastin e dytë jemi mobilizuar sërisht me Nuredin Dumanin për të vrarë Oti Kilën. Ne kemi shkuar 3 ditë me radhë në Elbasan, për ta gjetur Oti Kilën, por nuk e kemi gjetur.
“…unë kam shkuar në Morinë me një makinë që e kisha marë me qera dhe kam pritur në Kukës, Nuredin Dumanin. Kemi ardhur në Tiranë dhe më pas jemi vendosur në një banesë në Fier. Shkuam te shtëpia e Altin Kule, një shoku im, nuk jetonte njeri, ishte bosh. I thashë atij më duhen çelësat dhe kaq. Nuredini ishte në kërkim në atë kohë. Dy apo 3 ditë më vonë kam ardhur sërish në Tiranë, pasi kam marrë të dashurën e Nuredinit që erdhi me autobus nga Kosova dhe e kam çuar në Fier…”-ka treguar Henrik Hoxhaj.
Ky i fundit ka shtuar se Nuredin Dumani, kishte folur me një person që i thërriste “Sakati”, i cili i kishte gjetur një BMË të vjedhur për punë kriminale, Nuredinit.
“…Këtë BMË, kam shkuar unë dhe e kam marë në Kamëz, kundrejt një vlerë prej 6 mijë euro. BMË, ishte e vjedhur dhe numrat e shasisë i kishte të fshirë. Me këtë makinë kam shkuar në Fier dhe ja kam lënë Nuredinit. Unë me makinë të rregullt lëvizja para ndërsa Nuredini me makinën e vjedhur më ndiqte nga pas. Në Elbasan kemi shkuar plot 3 herë, duke kërkuar për lëvizjet e Oti Kilës. Nuk po e gjenim dot. Këmbëzën do e tërhiqja unë, ndërsa Nuredini do ishte shoferi për tu larguar me makinën e vjedhur të cilën do e digjnim pas kryerjes së krimit…”-ka pohuar Henrik Hoxhaj.
Ky i fundit shton se vonesa për të gjetur Oti Kilën dhe plagosja e Nuredin Dumanit, solli dështimin e planit të dytë për të kryer vrasjen e Kastriot Kilës.
Sipas Henrik Hoxhaj, për vrasjen Nuredini i kishte thënë se ka bërë një Pazar prej 80 mijë euro, ku fillimisht kanë marrë 10 mijë euro kapar për të filluar punën./Syri.net/
