Kreu i Partisë Demokratike, Sali Berisha, ka mbajtur sot një fjalim në foltoren e radhës përpara Kryeministrisë, ku akuzoi kryeministrin Edi Rama për pengimin e drejtësisë dhe mbrojtjen e korrupsionit.
Berisha tha se në Bruksel Ramës iu përcoll një mesazh i thjeshtë për të mos penguar drejtësinë, përndryshe dera e integrimit do të mbyllej.
Ai theksoi se përgjigjja e Ramës ishte sfiduese, duke deklaruar se nuk do të dorëzonte Lubinën, pasi sipas tij dorëzimi i saj do të ishte dorëzim i vetes.
“Në Bruksel Edi Ramës do i transmetohej një mesazh, mos pengo drejtësinë. Se ne të mbyllim derën. Ishte i thjeshtë. Sot në mëngjes Edi Rama iu përgjigj, më mbyllni derën se lëkurën time nuk e shes kurrë. Lubinë nuk e dorëzoj se po të dorëzoj Lubinë dorëzoj veten time. Sonte çdo shqiptar ndodhet para këtij kërcënimi të tmerrshëm madhor.
Edi Rama me vendimin e sotëm u tha shqiptarëve, se integrimin e japim, por korrupsionin nuk e dorëzojmë. Lëkurën tonë nuk e dorëzojmë. Në këtë kuadër protestat tashmë janë jetike dhe vendimtare për të shpëtuar atë ëndërr që nuk ishte vetëm e jona. Jo vetëm e studentëve 90, por ajo që ishte e formësuar nga Rilindja jonë që për Shqipërinë parajsë konsideronin ta shihnin zonjë mes kombeve të tjera europiane. Kjo ëndërr e Rilindjes u bë ëndërr e rinisë në vitet 90, në luftën kundër diktaturës.”- tha Berisha.
