Policia Kufitare në pikën e kalimit kufitar Qafë Morinë ka goditur dy raste të tentativës për kontrabandë të naftës nga Kosova drejt Shqipërisë, ndërsa janë proceduar penalisht dy shtetas.
Sipas njoftimit të policisë, janë referuar materialet procedurale në Prokurori, ku ka nisur procedimi penal për veprën “Kontrabanda me mallra për të cilat paguhet akcizë” ndaj shtetasve A. D., 25 vjeç, banues në Tropojë dhe I. P., 30 vjeç, banues në Pukë.
Gjatë kontrolleve të ushtruara në hyrje të Republikës së Shqipërisë, shërbimet e Policisë Kufitare kanë konstatuar sasi nafte të padeklaruara në autoritetet doganore, të cilat ndodheshin në kamionin që drejtohej nga 30-vjeçari dhe në automjetin që drejtohej nga 25-vjeçari.
Sasia e naftës u sekuestrua në cilësinë e provës materiale, ndërsa materialet procedurale iu referuan Prokurorisë së Kukësit për veprime të mëtejshme ligjore.
