Personat që shikoni në foton e mësipërme janë dy të rinjtë shqiptarë, Blendi Syla, 22 vjeç, dhe Robert Daci, 21 vjeç, të cilët humbën jetën në një aksident tragjik rrugor të ndodhur më 29 janar, në Itali.
Sipas mediave të huaja, të rinjtë po udhëtonin me një automjet tip Jeep Avenger, kur mjeti u përplas ballë për ballë me një kamion.
Përplasja ishte tejet e fortë, duke i lënë dy viktimat të bllokuara mes llamarinave të automjetit. Ekipet e emergjencës, me ndihmën e zjarrfikësve, arritën t’i nxjerrin nga makina, por fatkeqësisht për ta nuk pati asnjë mundësi shpëtimi.
Blendi Syla ishte me origjinë nga Kurbini, ndërsa Robert Daci banonte në Mat. Në automjet ndodhej edhe një person i tretë, gjithashtu me shtetësi shqiptare, i cili mbeti i plagosur rëndë, por ndodhet jashtë rrezikut për jetën.
Bilanci i aksidentit përfshin edhe tre persona të tjerë të plagosur. Në kamionin e përfshirë në përplasje udhëtonin një burrë dhe një grua, të cilët u transportuan për mjekim në Spitalin e Saviglianos dhe atë të Cuneos. Gjendja e tyre shëndetësore raportohet e stabilizuar dhe pa rrezik.
Kjo tragjedi rikthen në vëmendje edhe një tjetër humbje të rëndë për komunitetin shqiptar në zonë. Vetëm pak javë më parë, më 22 janar, Klaudio Gjoka, 22 vjeç, banues në Saluzzo, humbi jetën në një aksident tjetër rrugor në Revello, pasi u përplas nga pas me një mjet të rëndë.
