Vladimir Strati, emigrant prej 30 vitesh në Greqi, investoi kursimet e jetës për të ndërtuar në vitin 2014 një vilë dykatëshe në Korçë, me vlerë rreth 100 mijë euro.
Një vit më pas, zgjerimi i rrugës “Gjon Buzuku” nga Bashkia Korçë i preku gjysmën e banesës.
“Kishim një shtëpi të vjetër këtu në Korçë dhe menduam në një moment ta ndërtojmë, dhe e ndërtuam brenda kontureve të shtëpisë së vjetër pa zaptuar asnjë centimetër tokë më tepër. Në një moment, shteti bëri një plan dhe kaloi rruga, na mori gjysmën e shtëpisë, gjysmën e asaj pasurisë që kishim”, u shpreh Strati.
Në vitin 2015, Strati arriti një marrëveshje me Bashkinë për të modifikuar vetë pjesën e mbetur të shtëpisë, ndërsa për pjesën e zënë nga projekti u dëmshpërblye me 16 milionë lekë të vjetra. Por tani, prej 10 vitesh, familja Strati nuk pajiset me certifikatën e pronësisë për gjysmën e banesës që ka mbetur.
Pas një ankese zyrtare, ASHK Korçë lëshoi lejen e legalizimit, por refuzon certifikatën, pasi nga Bashkia Korçë është dërguar një shkresë ku deklarohet se familja është shpronësuar totalisht me vlerën 56 milionë lekë.
Strati provon me dokumente bankare dhe marrëveshjen zyrtare se ka marrë vetëm 16 milionë lekë të vjetra dhe se gjysma e shtëpisë ekziston ende, pa u prekur nga projekti.
Ne u interesuam në Bashkinë Korçë, ku kryetari Sotiraq Filo pranoi se çështja lidhet me një gabim në VKM-në e vitit 2015, ku prona e familjes është pasqyruar si e prishur plotësisht.
Sipas tij, Bashkia do të kërkojë korrigjimin e këtij vendimi nëpërmjet Këshillit Bashkiak dhe Drejtorisë së Shpronësimeve. Por nga Drejtoria e Shpronësimeve bëhet e ditur se VKM-ja e vitit 2015 nuk mund të ndryshohet, pasi për projektin janë konstatuar shkelje serioze nga Bashkia Korçë.
Pas një kalvari 10-vjeçar, Vladimir Stratit nuk i mbetet tjetër rrugë veçse t’i drejtohet Gjykatës për të detyruar Kadastrën të regjistrojë pronën dhe Bashkinë Korçë të dëmshpërblejë dëmin e shkaktuar ndër vite.
“Kemi dhjetë vjet që merremi me këtë punë. Kam ardhur për këtë punë nga Greqia sepse ngeli kjo punë, u bllokua nga Bashkia”, tha Strati. /Tv klan/
