Komisioni Evropian ka nisur një shqyrtim për të verifikuar nëse ish-politikani britanik Peter Mandelson ka shkelur rregullat e Bashkimit Evropian në lidhje me kontaktet e tij me Jeffrey Epstein, i dënuar për krime seksuale.
Edhe pse Mbretëria e Bashkuar u largua nga BE-ja gjashtë vite më parë, hetimi lidhet me periudhën kur Mandelson ka shërbyer si komisioner evropian nga viti 2004 deri në vitin 2008.
Sipas dokumenteve të publikuara së fundmi në Shtetet e Bashkuara, Mandelson dyshohet se në vitin 2010, kur ishte ministër i lartë në qeverinë britanike, mund ta ketë informuar paraprakisht Epsteinin për një paketë shpëtimi prej 500 miliardë eurosh për Greqinë, gjatë kulmit të krizës së borxhit.
Ministrat evropianë të financave kishin rënë dakord për këtë paketë emergjente, mes frikës se kriza ekonomike greke mund të përhapej në të gjithë eurozonën. Në dokumentet e publikuara, Epstein i shkruante Mandelsonit se “burimet” e tij konfirmonin se marrëveshja për paketën e shpëtimit ishte pothuajse e përfunduar. Mandelson i ishte përgjigjur: “Do të njoftohet sonte” dhe kishte shtuar se do ta telefononte sapo të largohej nga Downing Street./ Politico
