Meteorologu Hakil Osmani bëri parashikimin e motit për javën e parë të muajit shkurt, duke theksuar se kjo javë do të jetë në mbizotërimin e motit të paqëndrueshëm.
Sipas tij, gjatë kësaj jave problematik do të jenë parametrat e erës, kryesisht ditët e martë dhe e mërkurë. Gjithashtu, ai theksoi se edhe fundjava pritet të jetë në mbizotërimin e motit të paqëndrueshëm, me kthjellime dhe momente të pakta shiu.
“Dita e hënë ka nisur me mbizotërimin e vranësirave të dendura, të cilat herë pas here do të sjellin momente të shkurtra me pika shiu. Dita e martë dhe dita e mërkurë do të sjellin ndërprerje të reshjeve, duke krijuar vranësira të shpeshta, por edhe intervale të cilat priten të jenë më të dukshme në vijën bregdetare dhe në zonat e ulëta.
Dita e mërkurë, në pjesën e dytë të saj, do të sjellë zhvillim të vranësirave, ku gjatë orëve të mbrëmjes do të fillojnë reshjet e para të shiut në zonat jugperëndimore. Gjatë natës dhe në mëngjesin e së enjtes, territori do të jetë nën mbizotërimin e reshjeve, kryesisht të shiut. Zonat qendrore dhe veriore do të kenë reshje më të pakta.
Gjithashtu, dita e premte dhe fundjava pritet të mbetet e paqëndrueshme. Nga dita e martë dhe në vijim do të kemi rritje të temperaturave të ajrit, me maksimumet që mund të arrijnë deri në 20 gradë Celsisus dhe minimumet 2-3 gradë.
Një parametër tjetër problematik është era. Duke filluar që ditën e martë, do të kemi fuqizim të saj me shpejtësi deri në 65 km/orë në det të hapur. Kryesisht dita e martë do të jetë mjaft problematike, ndërsa dita e mërkurë do të sjellë vështirësi të theksuara për trafikun detar.
Edhe rajonet fqinje do të mbeten nën mbizotërimin e motit të paqëndrueshëm, kryesisht Kosova dhe Maqedonia e Veriut. Dita e martë dhe e mërkurë për të dy vendet do të sjellë mot të qëndrueshëm”, u shpreh Osmani për Euronews Albania.
