Kryedemokrati Sali Berisha tha para grupit parlamentar se misioni i opozitës me protesta do vazhdojë deri në rrëzimin e diktaturës së instaluar nga Edi Rama dhe deri në rikthimin e votës së lirë. Ai shtoi se po shkojnë drejt ngujimit në bulevard!
Teksa akuzoi mazhorancën dhe qeverinë për skandalet e panumërta, përfshi dy më të mëdhatë me zv/kryeministren Belinda Balluku dhe AKSHI, ai shtoi se “e gjithë Evropa dhe Bota po pret protestën tonë”.
Opozita sot bojkotoi Reformën Territoriale, teksa mazhoranca ka paralajmëruar se do prishi parimin e paritetit në seancën e nesërme të Kuvendit, ku pritet të marrë shumicën.
“Janë me qindra qytetarë që më shkruajnë dhe më thonë se nuk duhet të largohemi nga bulevardi pa larguar Edi Ramën. Ne drejt asaj do të shkojmë.
Të themi të vërtetën. Ne drejt asaj do të shkojmë në mënyrë të pashmangshme, në mënyrë të sigurt.
Ndaj dhe pikërisht ky moment duhet të jetë çështje e diskutimit tonë të gjerë me qytetarët, me mbështetësit tanë, me anëtarët tanë dhe popullin opozitar.
Ishte Rama që përdoret oficerët e policisë për të ekzekutuar në mes të sheshit, të aeroportit të Tiranës.
Ishte Rama që urdhëronte të dërgoheshin tek Suel Çela pengjet e marra për t’ua thyer kockat atje, që të hiqnin dorë nga tenderat.
Ishte Rama që bën që të jetë i lirë sot. Ergys Agasi jep urdhra njëlloj si më parë. Njëlloj. Po, absolutisht.
Përcakton, merr vendime se është Rama. Se normalisht, ai duhet të jetë në burg. Përkundrazi, atë e mbron Ergysi i policisë që quhet Ilirjan Proda, përfaqësues kryesor i karteleve.
Pra, që të mos e zgjasim më tej, gjithçka është në duart e qytetarëve.
Gjithçka është në duart e të rinjve shqiptarë, e studentëve, e të rinjve punëtorë, e gjimnazistëve.
Dhe unë kam shumë besim.
E gjithë Europa pret protestën tonë. E gjithë bota pret protestën tonë.
I kanë përcjellë protestat me simpatinë më të madhe, me vlerësimin maksimal. Ndaj dhe ne do të vazhdojmë misionin, misionin e përmbysjes së kësaj narkodiktaturë dhe rikthimin e votës së lirë për shqiptarët.”– tha Berisha.
