Kryeministri Edi Rama, në një takim me fermerët në Divjakë, foli edhe për përmbytjet në Shqipëri të cilat shkaktuan dëme të mëdha për bizneset dhe fermerët.
Ai tha se, ndryshe nga vendet e tjera të rajonit ku përmbytjet konsiderohen si fatkeqësi natyrore, në Shqipëri shpesh fajësohet qeveria.
“Kur e shohim përmbytjen në Itali, Greqi, Mal të Zi e RMV na duket si diçka që e sjell natyra, por kur e shohim këtu që e sjell qeveria”, tha Rama.
Megjithatë ndryshe nga vendet e tjera, në Shqipëri, përmbytjet nuk lidhen vetëm me reshjet e mëdha, por edhe me kanalizime të bllokuara, hidrovorë të pamirëmbajtur dhe mungesë të investimeve afatgjata në infrastrukturën mbrojtëse.
Këto janë faktorë që varen drejtpërdrejt nga menaxhimi shtetëror dhe jo nga natyra por siç duket kryeministri vendos ti anashkalojë duke përmendur vetëm faktin e reshjeve në vend.
“Ra shiu nuk ra shiu, erdhi breshëri apo uji. Historia e planetit ka ndryshuar. Po shikoja dje se çfarë ka bërë uji në jugun e Italisë ishte e tmerrshme, ishin çarë rrugët e kodrat dhe një qytet i tërë atje janë mbledhur dhe nuk di e ça të bëjnë se po bie. Kjo është historia e ndryshimeve klimatike.
Ne nuk bëjmë përjashtim nga kjo pavarësisht se jemi tipa të çuditshëm. Kur e shohim përmbytjen në Itali, Greqi, Mal të Zi e RMV na duket si diçka që e sjell natyra por kur e shohim këtu që e sjell qeveria.”, tha Rama.
