Një apartament i përshtatur për ushtrimin e prostitucionit është zbuluar nga Policia në Durrës, ku si rezultat janë proceduar dy shtetase braziliane dhe dy klientë shqiptarë.
Sipas Policisë, janë proceduar në gjendje të lirë shtetaset Th. C., 35 vjeçe, dhe A. F., 39 vjeçe, lindur në Brazil, si dhe dy klientët e tyre shqiptarë E. D. dhe S. A., banues në Durrës.
Dy brazilianet kishin marrë një apartament me qira, në zonën e Vollgës, lagjja nr. 1, Durrës, të cilin e kishin përshtatur me qëllim kryerjen e aktivitetit të ushtrimit të prostitucionit.
Në këtë apartament janë gjetur dhe sekuestruar, 1 080 euro, 116 700 lekë, 120 dollarë amerikanë, 80 paund britanikë, 150 franga dhe 3 430 dinarë, si dhe dy pasaporta të shtetaseve të huaja, 8 aparate celularë, karta telefoni dhe blloqe shënimesh.
Materialet proceduriale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës.
