Genc Huta nga zona e Ali Demit në Tiranë është një qytetar që, edhe pse fitoi pronën e tij në Gjykatën e Lartë, nuk arriti ta gëzojë për vite me radhë për shkak të mosveprimit të institucioneve shtetërore.
Familja Huta ishte e pajisur me të gjithë dokumentacionin ligjor dhe certifikatën e pronësisë, por gjatë procesit të azhornimit në Bashki u zbulua se në truallin e tyre ishte ndërtuar një objekt pa leje nga familja Shkoza, ndërsa Sotir Shuka kishte ngritur një mur rrethues, duke zaptuar rreth 70 metra katrorë tokë.
“Unë quhem Genci Huta. Disponoj një pronë të marrë në vitin 2000, me vendim të Gjykatës së Tiranës. Pas veprimit të Gjykatës, i jam drejtuar hipotekës. Kemi marrë vërtetimet e pronësisë. Pas këtij veprimi i jam drejtuar Bashkisë Tiranë për të bërë azhornim e pronës, e cila ndodhet në zonën kadastrale 81/80, me numër pasurie 8/270, sipërfaqe 368 m2. Pasi u njoha me vendin, me pronën i jam drejtuar ish-Institutit të Ndërtimeve në atë kohë. Kam kërkuar prishjen e objektit, se konstatova një objekt në tokën time. Procedurat zgjatën goxha.
Pas shumë vitesh arritëm të hapnim një proces gjyqësor. Personat që kanë ndërtuar mbi pronën e babait, janë familja Shkoza.
Kam kontaktuar personalisht në vitet 2000-2002 dhe jemi futur me disa kushërinj breënda banesës së tyre. Kemi kërkuar një kontakt. U kërkova se meqë ju keni ndërtuar kapanonin, të paktën meqe unë jam pronar mëjepni një qira sa ju e mendoni, 30 mijë lekë, 50 mijë lekë të vjetra. Nuk pranuan. Nga ky moment fillova procedurat për të prishur objektin, ndërkohë konstatova se mbi pronën time ka edhe një qytetar tjetër, i cili quhet Sotir Zhuka. Me një mur rrethues ka rrethuar një pjesë të mirë të pronës sime”, sqaron Huta.
Pasi institucionet refuzuan të vepronin për prishjen e ndërtimit pa leje, Genc Huta iu drejtua shkallëve të gjyqësorit.
Ai fitoi fillimisht në shkallën e parë, më pas në Apel dhe, pas 10 vitesh, në Gjykatën e Lartë arriti të marrë vendimin final në favor të tij. Megjithatë, prona nuk u lirua.
“Iu drejtova Gjykatës së Rrethit me padi, cënim dhe lirim prone. Edhe për Sotir Zhukën, edhe për familjen Shkoza. Vendosi pranimin e kërkesë-padisë.
Gjykata e Apelit la në fuqi vendimin e shkallës së parë, në favorin tonë. Ky vendim i Gjykatës së Apelit u ankimua në momentin pasi ne bëmë një marrëveshje me zyrën përparimore, në prill të 2015-ës dhe në momentin që familjarëve u shkon njoftimi nga zyra e përmbarimit ata bëjnë një kërkesë për rekurs.
Gjykata e Lartë dha vendimin në shkurt të vitit 2025. Gjykata e Lartë vendosi mos pranimin e rekursit të paraqitur nga pala e paditur. Nuk është ekzekutuar akoma vendimi”, shton Huta. /Tv Klan
