Ndjekja penale ndaj ish-deputetit laburist britanik, Conor McGinn, ka nisur pas një hetimi policor për një incident të dyshuar të ndodhur në korrik të vitit 2022.
McGinn, 41 vjeç, akuzohet për sulm seksual pas kallëzimit të bërë nga një grua. Prokuroria britanike bëri me dije se pas shqyrtimit të provave janë gjetur baza të mjaftueshme ligjore për nisjen e procedimit penal.
Zëvendësprokurorja e Kurorës për Londrën Jugore, Jessica Walker, deklaroi se ndjekja penale ndaj ish-deputetit është “në interes publik”.
Pas ngritjes së akuzave në vitin 2022, McGinn u pezullua nga Partia Laburiste dhe vijoi aktivitetin politik si deputet i pavarur deri në zgjedhjet e përgjithshme të vitit 2024, ku nuk arriti të rizgjidhej.
