Më 27 dhjetor 2025, në Durrës, një aksident rrugor i filmuar nga kamerat e sigurisë, i mori jetën një gruaje 71-vjeçare.
Nga pamjet rezulton, se drejtuesi 24-vjeçar i automjetit kthehet mbrapsht me shpejtësi dhe e përplas të moshuarën.
Fëmijët e viktimës e bënë publike ngjarjen, për shkak të masës së lehtë të sigurisë ndaj autorit, i cili qëndroi vetëm dy ditë në paraburgim dhe më pas u la me “detyrim paraqitjeje”.
“Kishim pak kohë që kishim humbur babain dhe unë erdha për këto festat e fundvitit. Erdha që të mos e lija mamin vetëm, atë ditë dolëm pak në mëngjes me mamin dhe na merr burri i motrës në telefon, sepse do të vinin që të më takonin. Kemi zbritur të tre poshtë pallatit, unë do të shkoja te makina, kurse mami te një komshi që e kemi përpara pallatit, për ta pyetur nëse do kishim mundësi që ta linim makinën përpara pallatit. Në atë moment erdhi një makinë me shumë shpejtësi, ndaloi, mami po kalonte rrugën dhe në atë moment ai me shpejtësi ecën mbrapsht dhe e përplas mamanë, i kalon sipër. E pashë në një gjendje shumë të keqe, që akoma nuk arrij dot ta heq nga mendja, por më tha vetëm dy llafe ‘jam keq’ dhe më pas nuk reagoi më”, trego i biri i të ndjerës.
“Për ne është një vrasje e dytë, sepse personi që ka bërë aksidentin është i lirë tani dhe kjo na bëri që ne t’i drejtohemi emisionit ‘Stop’. Nëna jonë dergjej atje dhe ky pa u bërë akoma 24 orë lirohet”, tha e bija.
“Nëna ka shkuar në një gjendje shumë të keqe në spital, kur unë kam takuar doktorin pasdite më ka thënë që është në gjendje shumë të rëndë. Me ato plagë ka mbijetuar 20 ditë, pas 20 ditësh nuk ia doli dot! Ndërroi jetë! Është një dhimbje shumë e madhe për ne. Është një skenë që nuk arrij dot ta jeh para syve”, shtoi djali.
Emisioni “Stop” siguroi pamjet e aksidentit dhe dëshminë e djalit të viktimës, që ishte dhe dëshmitar okular. Prokurori i çështjes, Sokol Nishani, fillimisht e klasifikoi ngjarjen si “shkelje e rregullave të qarkullimit rrugor” dhe kërkoi “arrest shtëpie”, por Gjykata e ndryshoi masën në “detyrim paraqitjeje”, pasi viktima në atë moment ishte ende gjallë dhe rasti ishte referuar si dëmtim i lehtë.
Nga ana tjetër edhe Spitali i Durrësit ka ndryshuar shkakun e vdekjes në skedën përkatëse, duke e quajtur vdekje natyrale.
Vajza e viktimës: Tani mami vdiq nga aksidenti. Tani, ti s’ke, pse e shkruan ti atë skedë, ashtu vdiq natyrale!
Mjeku, që plotësoi skedën e vdekjes: Ku ka vdekur e sëmura?
Infermierja: Në reaminacion, aksident politraumë.
Mjeku, që plotësoi skedën e vdekjes: Po shumë bukur! Ka vdekur në aksident…
Vajza e viktimës: Ëëë, ku shkruhet?
Mjeku, që plotësoi skedën e vdekjes: Këtu!
Vajza e viktimës: Po shikoje, ku e ka shkruajtur ajo! (infermierja)
Mjeku, që plotësoi skedën e vdekjes: Po mirë, mo! E ka bërë gabim, se nuk u bë nami!
Pas ndërhyrjes së emisionit, Prokuroria e rikualifikoi veprën penale në “aksident me pasojë vdekjen”./ Emisioni Stop
