Nga Boldnews.al
Deliri dhe tallja për opozitën ishin dy element të cilët kryeministri Edi Rama jo vetëm i shfrytëzoi, por e çoi deri në fund për të denigruar një subjekt politik që lindi si shpresë në vigjilje të rënies së komunizmit dhe është kthyer në kushte mbijetese, e abonuar për një kohë të gjatë dhe pacaktuar në opozitë.
“Në fillim thatë nuk ka ftesë, se unë jam mësuar me ju, ua jap pak nga pak. Doli ftesa, jo po këtë ftesën e ka gjithë bota. Tani thonë nuk je tek bordi, ok. Por u ngatërruat se nuk e dini si strukturohen grupet ndërkombëtare, kanë një organigramë që nuk e kuptoni”-tha Rama, duke i vënë vulën në fund: “Do ngrini kartonin dhe do votoni Bordin e Paqes dhe mua si përfaqësues i Bordit të Paqes në Shtëpisë së Bardhë, sot do ngrini kartonin”, tha ai, teksa i drejtohej deputetëve të PD-së, sidomos me sytë nga kryetari i saj, Sali Berisha.
Ashtu u bë. Me kokën ulur dhe duart përpjetë, opozita u vëtëofrua në një kastrim masiv politik teksa “ofroi allatet” në darët e kreut të qeverisë që pa asnjë mëshirë i bëri “steril” në mendime! Rama kapi dhe nuk po lëshon dy momente: çoroditjen e opozitës dhe shfrytëzimin e konjukturave ndërkombëtare për një bord që deri më tani ka pjesëmarrjen e shumë vendeve të botës së tretë, por që është refuzuar nga vende të rëndësishme perëndimore.
110 deputetë, PS dhe PD bashkë, votuan që Shqipëria dhe vetë Edi Rama të merrte pjesë në “Bordin e Paqes”, një nismë personale e presidentit amerikan Trump, i cili në takimet e para do të ketë në agjendë diskutimet për rindërtimin e Gazës. Projekti që ka shumë paqartësi sesi do funksionojë, i cili për analistë të njohur ndërkombëtarë eleminon rolin e OKB-së dhe shoqërohet me kosto financiare të vendeve anëtare, tashmë edhe me duart e bëra pis të opozitës do të shkojë para me “kryeliderin Rama”, ose Ramaduron siç e quanin para pak ditësh.
Për interesa personale, politikanë të majtë e të djathtë në 35 vite të ashtëquajtuara në letra demokraci, Amerikën e kanë përdorur jo për parimet që përçon, por interesin e tyre për mbajtje pushteti duke u mburrur se kush ofron më shumë për vendin e madh dhe shtirja se kush ka bërë foto me presidentët e radhës të SHBA-ve që ikin e vijnë apo sa herë kanë shtrënguar duart me ta në takime ndërkombëtare.
Nëse kjo lojë e pisët shkon mbarë e më mbarë për Ramën që është në ditët e tij më të mira, opozita përpëlitet pa ide, pa qëllime të hapura dhe mbi të gjitha në gafa të rënda politike. Pasojat jo më të një amatorizmi politik të opozitës, por qëllimkeq në praktikë, i vuajnë qindra mijëra qytetarë opozitarë që për 13 vite durojnë çizmen e rëndë të pushtetit që ose i detyron të largohen, ose të kërrusen nga pesha e rëndë e shtypjes.
Njësoj si me Avokatin e Popullit, ku fillimisht Shabës së Ramës i dhanë firmat e mbështetjes dhe në fund kërkuan tërheqjen, duke u bërë qesharakë edhe nga këlyshë malinj që ngjeshin fundshpinën në karrigën që ka fjalën fundore Popull… Të enjten votuan Ramën për të përfaqësuar “denjësisht” vendin në “Bordin e Paqes”, ndërsa të shtunën do të kërkojnë rrëzimin e Ramaduros!
