Ish-deputeti i Partisë Demokratike, Ervin Salianji, ka deklaruar se Statuti i PD-së nuk parashikon përjashtime për mendim ndryshe, por sipas tij, largimi ndodh vetëm kur një figurë humbet zgjedhjet.
Komentet e tij erdhën gjatë një takimi me demokratët në Lezhë, ku iu përgjigj deklaratave të kryedemokratit Sali Berisha, i cili kishte pohuar se Salianji është vetë-përjashtuar nga partia.
Salianji theksoi se ekziston një diferencë mes tij dhe kupolës drejtuese të PD-së, duke u paraqitur si figurë fituese, ndërsa lidershipin e cilësoi si humbës serial të zgjedhjeve.
“Në Shqipëri demokratët nuk kanë më frikë dhe nuk kanë çfarë të humbin. Interesi im është që PD të vijë në pushtet, ndërsa këta kanë hall të sulmojnë demokratët që duan PD-në në pushtet. Pse sulmojnë më shumë demokratët sesa Ramën? Ne kemi guximin për të fituar. Askush nuk na largon dot nga PD,” tha Salianji.
Ai përfundoi duke theksuar nevojën për ripërtëritje në PD: “Statuti nuk të largon për mendim ndryshe, por vetëm nëse humbet zgjedhjet. PD ka nevojë për ripërtëritje dhe për të shfrytëzuar fuqinë e demokratëve për të fituar.”
