Fondacioni Nobel ka bërë një ndërhyrje institucionale për të mbrojtur prestigjin e Çmimit të Paqes, duke sqaruar se medalja nuk mund të transferohet ose të rindahet, as simbolikisht.
Ndërhyrja erdhi pas vendimit të laureates së Çmimit Nobel për Paqen dhe udhëheqëses së opozitës venezueliane, Maria Corina Machado, për t’ia dorëzuar çmimin Donald Trump, i cili e falënderoi për gjestin e saj.
Në një njoftim të ri, Fondacioni Nobel thekson se një nga misionet e tij themelore është ruajtja e dinjitetit të çmimeve dhe e procesit të dhënies së tyre, ashtu siç parashikohet në testamentin e Alfred Nobelit.
Çmimet, nënvizon Fondacioni, jepen ekskluzivisht për ata që “kanë sjellë përfitimin më të madh për njerëzimin” dhe vetëm nga organet kompetente të përcaktuara për secilën kategori.
Për rrjedhojë, çmimi nuk mund të transferohet, të ridhurohet apo të shpërndahet më tej, as në nivel simbolik. Fituesi fillestar është ai që regjistrohet në histori.
Kjo është ndërhyrja e dytë e Fondacionit, i cili pas deklaratës publike të Machados se synon t’ia japë çmimin e saj Trumpit, sqaroi se pavarësisht fatit të medaljes, diplomës apo shpërblimit financiar, fituesi fillestar mbetet dhe do të mbetet ai që regjistrohet historikisht si përfitues i çmimit.
Njëkohësisht, Komiteti kishte sqaruar se statuti i Fondacionit Nobel nuk vendos kufizime lidhur me mënyrën se si një fitues mund të disponojë elementët materialë të çmimit, si medalja, diploma apo shpërblimi financiar, të cilat mund të mbahen, të dhurohen apo të përdoren sipas gjykimit të tij.
