Një situatë tejet shqetësuese po denoncohet nga banorët e fshatit Terbaç, të cilët ngrenë alarmin për gjendjen e rrugës që lidh komunitetin e tyre me aksin kryesor Vlorë–Kuç. Rruga, e ndërtuar së fundmi nga shteti dhe e përfunduar nga Bashkia e Himarës, ka nisur të degradojë në mënyrë alarmante vetëm pak muaj pas përfundimit të punimeve.
Sipas banorëve, problemi kryesor lidhet me cilësinë skandaloze të punimeve, veçanërisht te kanalet anësore të kullimit të ujërave. Betoni i vendosur përgjatë rrugës, sipas tyre, nuk është realizuar me çimento cilësore dhe është aq i dobët sa shkatërrohet lehtësisht me dorë ose me një goditje të lehtë, duke krijuar gropa dhe dëmtime të rrezikshme.
“Është një turp dhe një vjedhje e hapur me fondet publike,” shprehen banorët, të cilët theksojnë se standardet e ndërtimit nuk janë respektuar aspak.
Situata përkeqësohet edhe më tej nga dëmtimi i asfaltit, i cili ka nisur të shkulet vetëm tre muaj pas reshjeve të para të shiut. Për shkak të mungesës së një sistemi funksional kullimi, uji grumbullohet në anë të rrugës, duke përshpejtuar shkatërrimin e saj dhe duke rritur rrezikun për qarkullimin e automjeteve.
Të revoltuar nga kjo gjendje, banorët e Terbaçit organizuan një protestë dhe publikuan video në rrjetet sociale, ku shihen përfaqësues të bashkisë që, sipas tyre, vetëm “bënin sikur po jepnin shpjegime”, ndërsa premtuan se rruga do të rregullohej.
Pas presionit publik, janë kryer disa ndërhyrje të pjesshme, ku disa segmente të rrugës janë gërryer me makineri. Megjithatë, një pjesë e madhe e zonave problematike kanë mbetur të paprekura, ndërsa dëmtimet vazhdojnë të shtohen.
Banorët kërkojnë një ndërhyrje serioze dhe të plotë, jo rregullime sipërfaqësore, si dhe transparencë të plotë mbi fondet e shpenzuara dhe firmën që ka kryer punimet. Ata theksojnë se kjo rrugë është jetike për fshatin Terbaç dhe se është e papranueshme që të shkatërrohet në kaq pak kohë, duke rrezikuar jo vetëm investimin publik, por edhe sigurinë e qytetarëve.
View this post on Instagram
