Ernest Muçi u shndërrua sërish në heron e Trabzonsporit, duke i dhënë skuadrës fitoren e radhës në transfertën ndaj Kocaelisporit.
Sulmuesi shqiptar realizoi golin vendimtar në minutën e parë shtesë, me një goditje të fortë dhe të saktë, që nuk i la asnjë mundësi portierit kundërshtar, duke vulosur suksesin 2–1.
Pas përfundimit të ndeshjes, Muçi u shpreh i kënaqur për paraqitjen e ekipit dhe rëndësinë e tri pikëve: “Ishte një nga ndeshjet më të vështira të sezonit. Luftuam për çdo top dhe mendoj se e merituam plotësisht fitoren.
Sulmuesi theksoi edhe filozofinë e tij të lojës: “Të shënosh është gjithmonë kënaqësi, por mbi të gjitha duhet të vraposh dhe të luftosh për skuadrën. Kur i bën këto gjëra mirë, golat vijnë vetë. Gjëja më e rëndësishme është të ndihmosh ekipin”.
Muçi zbuloi se kishte ndier se momenti i tij do të vinte: “E ndieja që një mundësi do të më shfaqej dhe, kur ndodhi, e dija se do të merrja maksimumin prej saj. Kundërshtarët luftuan deri në fund, por si lojtar ofensiv duhet të jesh gati ta shfrytëzosh rastin. Këtë bëra”.
