Përfaqësues të Lëvizjes Shqipëria Bëhet kanë ndërmarrë sot një aksion përpara Kryeministrisë, ku kanë kërkuar që qytetarët të rreshtohen në reagimin kundër qeverisë.
Njëkohësisht është bërë me dije edhe data e protestës, duke thirrur tubim ditën e nesërme, 17 janar në orën 18:00.
Ndërkohë, kreu i “Shqipëria Bëhet”, Adriatik Lapaj ka kërkuar që qytetarët t’i bashkohen protestës, për të reaguar kundër “regjisorit të këtij sistemi korruptiv”.
Lapaj theksoi se ata që janë përmbytur në muajt e fundit duhet të pyesin veten nëse mjafton të ankohen apo duhet të ngrihen e të protestojnë.
Ai iu drejtua edhe prindërve që kanë parë fëmijët e tyre të largohen nga vendi, duke i ftuar të reflektojnë mbi shkaqet e kapjes së shtetit.
Një tjetër apel i tij ishte për pronarët që kanë humbur pasuritë e tyre përtej çdo logjike dhe ligji, duke i ftuar të bashkohen në protestë.
“Në këtë vënd ka shumë për të thënë, shumë për të reaguar. Ata që janë përmbytur në muajt e fundit duhet të pyesin veten a duhet të cohen të protestojnë përballë kësaj qeverie ndaj i ftoj nesër në orën 6 të mbadites ditën e shtunë të protestojnë.
Ata që u largohen fëmijët duhet ta pyesin veten a duhet të protestojnë përballë atyre që ua largojnë si shkak i kapjes së shtetit. Ata që u prishen pronat përtej cdo logjike përtej ligjit duhet të pyesin veten a duhet të protestojnë dhe të bashkohen.
Ata që shkojnë në spitale dhe nuk gjejnë ilace, duhet të pyesin veten a mjafton të ankohen apo duhet të protestojnë.
Ata që përballen me tatimet dhe padrejtësitë e gjobaxhinjve duhet të pyesin veten a duhet të bashkohen e të protestojnë. I ftoj të bashkohen ditën e shtunë pasdite të gjithë personave që mendojnë që ky regjim duhet ndryshuar përballë regjizorit që është përgjegjës për fatkeqësitë e Shqipërisë.” – tha Lapaj.
