Bashkimi Evropian po diskuton një skenar të ri për afrimin e Ukrainës me BE-në, i cili mund të përshpejtojë procesin e anëtarësimit, por pa i dhënë fillimisht të drejta të plota vendimmarrjeje.
Sipas Financial Times, ideja që po shqyrtohet parashikon që Ukraina të bëhet formalisht anëtare e BE-së, por pa të drejtë vote në samitet e liderëve dhe në takimet ministrore në fazën e parë. Ndërkohë, ajo do të kishte akses gradual në tregun e përbashkët evropian.
Propozimi parashikon gjithashtu që Ukraina të përfitojë ndihmë financiare dhe bujqësore vetëm pasi të përmbushë disa kritere pas pranimit.
Plani ka ngritur shqetësime në disa shtete anëtare të BE-së dhe te vende të tjera kandidate, pasi ekziston frika se një model i tillë do të krijonte një Evropë “me dy shpejtësi”. Sipas kritikëve, kjo qasje mund të dëmtojë parimin e anëtarësimit të plotë dhe të krijojë konfuzion për vendet që janë prej vitesh në pritje të pranimit.
Burime të cituara nga Ukrainska Pravda bëjnë me dije se ideja është ende në diskutim dhe nuk ka ende një vendim përfundimtar.
Diplomatë evropianë paralajmërojnë se një formulë e veçantë për Ukrainën mund të ketë ndikim edhe për kandidatë të tjerë, përfshirë vendet e Ballkanit Perëndimor si Mali i Zi dhe Shqipëria.
