Një 21-vjeçar shqiptar është arrestuar në Bolzano të Italisë, pasi u zbulua se banesa ku qëndronte ishte kthyer në një bazë të trafikut të kokainës.
Operacioni u krye nga karabinierët e njësisë Bressanone në Luginën Isarco, të cilët ndërhynë mbrëmjen e djeshme në autostradën Brennero, në zonën e Chiusa, konkretisht në Piazza Fraghes. Gjatë aksionit, oficerët ndaluan automjetin ku udhëtonte i riu dhe kryen një kontroll të imtësishëm.
Në makinë u gjetën dy pako që përmbanin gjithsej 200 gramë kokainë të pastër. Pas kësaj, policia ushtroi kontroll edhe në banesën e tij në Naz-Sciaves, ku u sekuestruan një peshore precize dhe dy thika me gjurmë të dukshme të një substance të bardhë.
Sipas karabinierëve, nuk ka dyshim se substanca e sekuestruar ishte kokainë. I riu shqiptar u shoqërua menjëherë në burgun e Bolzanos, ku do të qëndrojë në pritje të hetimeve dhe gjykimit.
